2,3 mln gektar jaıylym jer zańnamasyn buza otyryp berilgen – Bas prokýror

NUR-SULTAN. QazAqparat – Prokýratýra organdary jaıylym jerlerdi bólý máseleleri boıynsha jergilikti atqarýshy organdardyń qyzmetine tekserý júrgizip jatyr. Bul jaıynda Májilis depýtattarynyń saýalyna QR Bas prokýrory Ǵızat Nurdáýletovtiń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta Prezıdent tapsyrmasyna sáıkes prokýratýra jaıylym jerlerdi bólý máseleleri boıynsha jergilikti atqarýshy organdardyń qyzmetine tekserý júrgizip jatyr. Qazirgi kezeńde prokýrorlar jer zańnamasyn buza otyryp berilgen jalpy aýmaǵy 2,3 mln gektardy quraıtyn 3,5 myń jaıylym ýchaskesin anyqtady», - delingen Ǵızat Nurdáýletovtiń jaýabynda.

Sonymen qatar ol sońǵy 3 jylda paıdalanylmaıtyn 12 mln gektar jaıylym anyqtalǵandyǵyn atap ótti.

«Sońǵy úsh jyldyń ishinde prokýratýra organdary el aýmaǵynda jalpy aýdany 12 mln gektar 26,5 myń paıdalanylmaı jatqan jaıylymdy anyqtady. Qabyldanǵan is-sharalardyń arqasynda aýdany 3,6 mln gektar 2,4 myń ýchaske (kadastyrlyq quny 8,8 mlrd teńge) memleketke qaıtaryldy.4,6 myń ýchaskeni ıgerý bastaldy. Bul baǵyttaǵy jumys jalǵasýda», - dedi ol.