1945 jyly Jeńisti Berlınde toıladyq - UOS ardageri Múbarak Kákenov

ASTANA. QazAqparat - «Búgingi 9 mamyr - Jeńis kúnimen barsha qazaqstandyqtardy quttyqtaımyn! Barlyq Uly Otan soǵysynyń ardagerlerine zor densaýlyq tileımin! Aspanymyz ashyq bolyp, elimizge Alla taǵala tynyshtyǵyn bersin!» - deıdi UOS ardageri Múbárak Kákenov aqsaqal.

«Búgin, mine, Uly Jeńistiń 69 jyldyǵyn aman-esen qarsy alyp otyrmyz. Bul, árıne, táýelsizdigimizdiń arqasy. Árdaıym elimiz aman, jurtymyz tynysh bolsyn! Biz kórgen soǵysty keleshek urpaq kórmesin! Beıbit zaman bolsyn!» - dedi M. Kákenov.

Ardagerdiń aıtýynsha, ol kisi soǵystyń aıaǵyna deıin qatysyp, eli úshin qan maıdanda basqynshy jaýǵa qasqaıyp qarsy turǵan. Soǵysta kórsetken erligi de eskerýsiz qalmaǵan. «Otan soǵysy», «Berlındi alǵany úshin», «Belarýssııany azat etkeni úshin», «Ýkraınany azat etkeni úshin» ordenderimen marapattalǵan.

«Men ózim Birinshi Belarýs maıdanynda bolyp, Belarýssııany, Polshany azat etýge qatystym. 1945 jyldyń 2 mamyrynda Berlınge basyp kirip, Jeńis kúnin sol jerde toıladyq. Soǵystan keıin elge oralyp, úılenip, 11 balanyń ákesi boldym», - dep eske alady ardager.