1945 j. 27 sáýiri: Keńes áskerleri Berlınniń eń sońǵy qorǵanys shebi - Tırgartenge shyqty. Reıhstagqa deıin tikeleı - 2250 metr

ALMATY. QazAqparat- 1945 jyldyń 27 sáýiri - soǵystyń 1406-shy kúni Keńes áskerleri Berlınniń eń sońǵy ortalyq qorǵanys shebi - Tırgarten parkine shyqty. Reıhstagqa (Parlament ǵımaraty) deıin tikeleı - 2250 metr qaldy. Bul týraly «Sotsıalıstik Qazaqstan» gazetiniń 1945 jyldyń 29 sáýirindegi (jeksenbi)  №84-shi sanynda basylǵan Keńes aqparat bıýrosynyń málimetinde aıtylǵan.

Aıta ketelik, Tırgarten (zoobaq) - Berlınniń ortalyq aýmaǵy. Aral ispettes. Aınalasy Shpree ózeni jáne basqa da sý arnalarymen qorshalanǵan. Uzyndyǵy 8 shaqyrym, al eni 2 shaqyrymdy quraıdy.

Berlınniń ortalyǵyna jaqyndaǵan saıyn, quramalar men bólimshelerdiń shabýyldaý ýchaskeleri taryla bastady. Bul árıne qolbasshylyq tarapynan asa saqtyqpen, úılesimdi soǵys qımyldaryn jasaýdy talap etti. 

Sonymen, Berlınde kóshe urystary jalǵasýda. Naqtyraq aıtar bolsaq, 1-shi Belorýs maıdanynyń 2-shi gvardııalyq tank armııasy Shpree ózenine ótip, Vestend stansasyn alǵan soń, Tırgarten parkine jáne Berlınniń ortalyq aýdandarynyń biri - Shrlottenbýrgke qaraı jyljyp jatyr. 3-shi ekpindi armııa Ferbıngdýs sý arnasynan ótip, Moabıt aýdanyna jaqyndady. 5-shi ekpindi armııa 1250 metr alǵa jyljyp, qalanyń 40-tan astam kvartalyn jaýdan tazartty.  Al 1-shi gvardııalyq tank armııasy Neıkeln aýdanynda aýyr urystar júrgize otyryp, qalanyń 80 kvartalyn basyp aldy. 

«1-shi BELORÝS maıdanynyń áskerleri shabýyldaı otyryp, 27 sáýir kúni Ortalyq Germanııanyń mańyzdy qorǵanys toraptary - RATENOV, ShPANDAÝ jáne POTSDAM qalalaryn aldy. Bir mezette maıdan áskerleri Berlınde kóshe urystaryn júrgize otyryp, NEIKELLЬN, TEMPELЬHOF aýdandaryn jáne TEMPELЬHOF áýejaıyn basyp aldy» - delingen málimette.

26 sáýir kúni bolǵan urystarda maıdan áskerleri 8500 nemis soldaty men ofıtserin qolǵa túsirip, 20 - ushaq, 200 - tank jáne 290 - dala zeńbiregin oljalaǵan.

Al 1-shi Ýkraın maıdanynyń áskerleri men anglo-amerıkalyq áskerler shyǵystan jáne batystan shabýyldaı otyryp, 25 sáýirde TORGAÝ qalasy mańynda 13 saǵat 30 mınýtta qosyldy. Osylaısha, Germanııanyń soltústigindegi nemis áskerleri, ońtústiktegi áskerlerden bólinip tastaldy.

«27-shi sáýirde maıdan áskerleri nemisterdiń ELЬBA ózenindegi mańyzdy qorǵanys pýnkti VITTENBERG qalasyn aldy. Sonymen qatar maıdan áskerleri BERLINDE de kóshe urystaryn júrgizip, ShTEGLITs jáne ShMARGENDORF aýdandaryn aldy» - delingen málimette.

26 sáýir kúni bolǵan urystarda maıdan áskerleri 3000-nan astam nemis soldaty men ofıtserin qolǵa túsirip, dushpannyń 85 ushaǵyn oljalady.

Chehoslovakııa jerinde 2-shi ÝKRAIN maıdanynyń áskerleri ÝGERSKI BROD jáne ÝGERSKI OSTROG qalalaryn jáne SÝHA LOZ, HAVRJITsE, VLChNOV, GLÝK jáne BLATNITsE eldi-mekenderin azat etti.

2-shi BELORÝS maıdanynyń áskerleri bolsa 27-shi sáýir kúni Germanııanyń batys Pomeranııa provıntsııasynyń PRENTsLAÝ, ANGERMıÝNDE jáne PELITTs qalalaryn jáne ıASENITTs, HAMMER, ShTOLЬTsENBÝRG, PAMPOV, MEVEGEN, BOOK, LEKNITTs, BERGHOLЬTs, BRıÝSSOV, FARENVALЬDE, KLOKOV, BERTIKOV, GRAMTsOV, PASSOV, HOEN LANDIN iri eldi-mekenderin aldy.