1945 j. 23 sáýiri: Keńes áskerleri Berlınniń birqatar bóligin basyp aldy
Naqty aıtar bolsaq, 1-shi Belorýs maıdanynyń 3-shi ekpindi armııasy Berlınniń shyǵys jáne soltústik bóliginde qııan-keski urystar júrgizýde. 2-shi gvardııalyq tank armııasy Berlındegi urystardan alynyp, qalanyń ońtústik-batys mańyna baǵyttaldy. Munda armııa Berlın-Shpandaýer-Shıffarts sý arnasyna shyqty. Berlınge shyǵys jaqtan shabýyldap kele jatqan 5-shi ekpindi armııa qalany basyp ótetin Shpree ózenine jetip, odan óte bastady. 1-shi gvardııalyq tank armııasy men 8-shi gvardııalyq armııasy da Berlındi ońtústiginen qursaýlaı otyryp, Shpree ózenine jetip, odan ótýge áreket jasaýda. 33-shi armııa Oder-Shpree sý arnasyna shyqty. Bul kúni nemisterdiń Shteıner armııalar toby soltústikten Berlınge qaraı keńes áskerlerine qarsy shabýylǵa kóshkenimen, keıin sheginýge májbúr boldy. Berlınde nemis qolbasshylyǵy óz áskerleriniń qarsylyǵyn kúsheıtý úshin qatań sharalar qabyldady. Mysaly, nemis artıllerııalyq bólimshelerine keıin sheginip jatqan óz jaıaý áskerlerin jarqynshaqty snarıadtarmen atý buıyryldy. Al 1-shi Ýkraın maıdanynyń 4-shi tank armııasy Potsdam baǵytynda shabýyldaı otyryp, Berlındi ońtústik-batys jaǵynan qorshaýǵa ala bastady. Soltústikten dál osy baǵytta kele jatqan 1-shi Belorýs maıdanynyń 47-shi armııasyna deıin 25 shaqyrym ǵana qaldy. Demek, Berlındi tolyǵymen qorshaýǵa alýǵa sanaýly ýaqyt qaldy degen sóz. Bul kúni osy maıdannyń 3-shi gvardııalyq tank armııasy Berlınniń ońtústigindegi Teltov-kanalynan ótýge muqııat daıyndaldy. Maıdannyń 28-shi armııasy da osy kanalǵa kelip toqtady. Bul armııa bir mezette nemisterdiń frankfýrt-gýben tobyn soltústik-batystan qamalaýǵa kóshti. 3-shi gvardııalyq armııa qaıta toptastyrylyp, nemisterdiń frankfýrt-gýben tobyn qorshaýǵa ala bastady. Bul kúni resmı málimetter boıynsha Keńes áskerleri jalpy Berlın jáne Drezden baǵytynda birneshe ondaǵan shaqyrym alǵa jyljyp, birqatar qalalar men eldi-mekenderdi basyp aldy. Bul týraly «Sotsıalıstik Qazaqstan» gazetiniń 1945 jyldyń 25 sáýirindegi (sársenbi) №81-shi sanynda jarııalanǵan Keńes aqparat bıýrosynyń málimetinde naqty kórsetilgen. «1-shi Belorýs maıdanynyń áskerleri Oder ózeniniń batys jaǵyndaǵy platsdarmnan shabýylǵa kóship, artıllerııa men avıatsııanyń qoldaýy arqasynda nemisterdiń qat-qabat myqty bekinisterin buzyp ótip, 60-100 shaqyrym alǵa jyljydy. Sóıtip, ODERDEGІ FRANKFÝRT, VANDLITs, ORANIENBÝRG, BIRKENVERDER, GENNIGSDORF, PANKOV, FRIDRIHSFELЬDE, KARLSHORST, KEPENIK qalalary men qalashyqtaryn basyp alyp, Berlınge basyp kirdi. 22-shi sáýirdegi urystar barysynda maıdan áskerleri 4000 -nan asa nemis soldaty men ofıtserin qolǵa túsirip, 85 - dala zeńbiregin, 3100 - avtomashına, 67 - paravoz, 1800 - temir jol vagony jáne soǵys múlki qoıylǵan 30 qoımany oljalady. Al 1-shi Ýkraın maıdanynyń áskerleri de shabýylǵa shyǵyp, artıllerııa men avıatsııanyń qoldaýy arqasynda nemisterdiń kúshti nyǵaıtylǵan qat-qabat myqty bekinisterin buzyp ótip, 80 shaqyrymnan 160 shaqyrymǵa deıin alǵa jyljydy. Sóıtip, KOTBÝS, LıÝBBEN, TsOSSEN, BELITs, LÝKENVALЬDE, TROIENBRITsEN, TsANA, MARIENFELЬDE, TREBBIN, RANGSDORF, DIDERSDORF, TELЬTOV qalalalaryn basyp alyp, Berlınge ońtústik jaqtan basyp kirdi. Bir mezetıte DREZDEN baǵytynda maıdan áskerleri urys júrgize otyryp, ESSEN, KIRHHAIN, FALЬKENBERG, MıÝLЬBERG, PÝLЬSNITs qalalaryn basyp alyp, DREZDENNІŃ soltústik-batysynan Elba ózenine shyqty. 22-shi sáýir kúni maıdan áskerleri 7000-nan asa nemis soldaty men ofıtserin qolǵa túsirip, 200 tank, 105 dala zeńbiregin jáne 3000 avtokólikti oljalady. 4-shi ÝKRAIN maıdanynyń áskerleri shabýyldaı otyryp, Chehoslovakııa jerinde OPAVA qalasyn basyp aldy. Al 2-shi ÝKRAIN maıdanynyń áskerleri Chehoslovakııa jerinde GODONIN qalasynyń ońtústik batysynda MIKÝLOV qalasyn jáne LEDNITsE, PÝLGARI, PAVLOV, PERNA, PRATLSBRÝN, DOLЬNYE DÝNAEVITsE, DOBROE POLE eldi-mekenderin jaýdan azat etti» - delingen málimette. Jalpy, 22-shi sáýir kúngi urystarda barlyq maıdanda 165 jaý tankisi men ózdiginen júretin zeńbiregi talqandaldy jáne joıyldy. Al áýe urystarynda zenıttik artılerııanyń kúshimen 61 jaý ushaǵy atyp túsirilgen.