19 myńǵa jýyq qostanaılyq áleýmettik mártebesin jarııalaýdan bas tartqan
Aıta keterligi, 2017 jyly elimizde mindetti áleýmettik medıtsınalyq saqtandyrý júıesi engizildi. Osyǵan baılanysty oblysta azamattardyń mártebesin anyqtaý jumystary júrip jatyr. Oblys óńirlerinde ákimdikter men jumyspen qamtý qyzmetiniń ókilderi, ýchaskelik ınspektorlardan jumysshy toby jasaqtalǵan.
«Bizdiń mindetimiz - úı-úıdi aralaý arqyly azamattardyń mártebesin naqtylaý. Osy arqyly mindetti áleýmettik medıtsınalyq saqtandyrý qoryna qarjy aýdarýǵa qaýqarsyz azamattarmen tolyqqandy jumys isteımiz. 2017 jyly oblysta osyndaı sanattaǵy 330 myń adam anyqtaldy. Atqarylǵan jumystardyń nátıjesinde 285 myń adam memlekettik kiris organdaryna shaǵyn kásipkerlik, nátıjeli jumyspen qamtý sýbektisi retinde tirkeldi»,-deıdi basqarma basshysy.
Qostanaı oblysynda 38600 adamnyń áleýmettik mártebesi naqtylanbaǵan. Olardyń 7 paıyzy jaldamaly jumysta istese, 26 myńǵa jýyǵy ózin-ózi jumyspen qamtıdy. Budan bólek, taǵy 7 myń áıel úı sharýasynda.
«Qazir basqarma ózin-ózi jumyspen qamtyp otyrǵan 26 myń adammen belsendi túrde jumys istep jatyr. Olardy jumysqa ornalastyrý maqsatynda tıisti mekemelerge habarlasý usynyldy. Al tek otbasylyq sharýashylyqpen aınalysatyn jandarmen memlekettik kiris organdary jumys isteıdi»,- deıdi Gúlnár Taýbaeva.
Úı-úıdi aralaý jumystary kezinde oblystaǵy 18661 adam ózderiniń áleýmettik mártebesin anyqtaýdan bas tartqan. Oblys basshysy Arhımed Muhambetov osy baǵyttaǵy jumystardy kúsheıtýdi júktedi.
«18 myń adamnyń bas tartýy oblystyq basqarmanyń jumys nátıjesin kórsetedi. Óńirlerde aqparattyq-nasıhat jumystary durys júrgizilmeı otyr. Budan bylaı medıtsınalyq qyzmet tek saqtandyrylǵan azamattarǵa kórsetiledi. Áleýmettik mártebesin anyqtamasa, zeınetke shyqqanda da qıyndyq týǵyzady.Turǵyndarǵa osyny túsindirý qajet», - dep tapsyrdy Arhımed Muhambetov.
Gúlnár Taýbaeva aıtqandaı, áleýmettik mártebeni anyqtaýdyń birneshe joly bar. Birinshiden, eger azamat beıresmı jumys isteıtin bolsa, onda ol jumys berýshimen eńbek shartyn qurýy tıis. Ekinshiden, eger azamat tabys ákeletin qandaı da bir kásipkerlikpen aınalysatyn bolsa, onda salyq organdarynda tirkelýi qajet. Eger azamattyń tabys kózi bolmaı, jumyssyz bolsa, turǵylyqty mekenjaıy boıynsha Halyqty jumyspen qamtý ortalyǵynda jumyssyz retinde tirkelýi kerek. Ortalyqta azamatty jumysqa ornalastyrý jáne kásibı qaıta daıarlaý boıynsha qoldaý kórsetiledi. Jumyssyz mártebesin alǵan azamattar jeńildigi bar sanatqa jatqyzylady. Olar medıtsınalyq saqtandyrýdy memleket tarapynan alýǵa quqyly. MÁMS sheńberinde áleýmettik mártebeni anyqtaý egov.kz portalynda da qoljetimdi. Ol úshin «Tekserý servısteri» bóliminen «Áleýmettik mártebesin tekserý» qyzmetin tańdap, ózińizdiń JSN-dy terip, ótinish jiberesiz. Bul rette jaýap qolma-qol qaıtarylady. Qyzmetti elektrondyq tsıfrlyq qoltańba arqyly portalǵa tirkelgen jaǵdaıda alýǵa bolady.