19 myń oqýshyny Almaty ákimdigi mektepke tegin daıyndaıdy

ALMATY. QazAqparat - Bıyl Almatyda muqtaj otbasylardan shyqqan 19 myń oqýshyǵa mektep formasy men keńse zattaryn satyp alýǵa ákimdik 800 mln teńge bólip otyr. Bul týraly Óńirlik kommýnıkatsııalar qyzmetinde ótken brıfıngide qalalyq Bilim basqarmasynyń basshysy Lázzat Jylqybaeva málim etti, dep habarlaıdy QazAqparat tilshisi.

Spıkerdiń sózinshe, Almatyda 1 tamyzda «Mektepke jol» respýblıkalyq aktsııasy bastalady.

«Bıyl aktsııa 30 qyrkúıekke deıin jalǵasady jáne «Mektepke jol – shekarasyz jaqsylyq» uranymen ótedi. Ol az qamtylǵan jáne kópbalaly otbasylardan shyqqan oqýshylarǵa, jetim balalarǵa, sondaı-aq ata-ana qamqorlyǵynsyz qalǵan balalarǵa oqý jylynyń bastalýyna daıyndyq kezinde materıaldyq qoldaý kórsetýge jáne áleýmettik sebepter boıynsha balalardyń mektepke kelmeýiniń aldyn alýǵa baǵyttalǵan»,- dedi ol.

Turmysy tómen otbasynda tárbıelenetin balalardy mektepke daıyndaý úshin qala bıýdjetinen 800 mln teńge bólinedi.

«Almaty qalasynyń muqtaj otbasylarynan shyqqan 19 myń oqýshyǵa kómek kórsetý úshin ákimdik mektep formasy men keńse kerek-jaraǵyn satyp alýǵa kómek kórsetedi. Bul maqsatqa jergilikti bıýdjetten 800 mln teńge qarastyrylǵan», - dedi ol.

Qazirdiń ózinde mektepterde oqýshylarǵa oqý jylyna daıyndyqqa kómek kórsetý boıynsha jumystar júrgizilip jatyr.

«Kómekke muqtaj balalardyń derekter bazasy quryldy. Azamattardyń ótinishterine jedel áreket etý úshin shuǵyl jeliler, senim telefondarynyń jumysy uıymdastyryldy. Telefon nomeri Almaty qalasy Bilim basqarmasynyń saıtynda kórsetilgen», - deıdi basqarma basshysy.

Lázzat Jylqybaeva 1 qyrkúıekten bastap memlekettik mektepterdiń 1-4 synyp oqýshylary tegin tamaqtanatynyn eske saldy.