180-nen astam demalys orny bar Alakól jaǵalaýynda týrıstik polıtsııa qyzmet etedi

ÓSKEMEN. QazAqparat - Shyǵys Qazaqstan oblysynda týrıstik polıtsııa qyzmetkerleri 200-den astam ákimshilik quqyq buzýshylyqty anyqtady, dep habarlaıdy QazAqparat tilshisi.

ShQO Polıtsııa departamentiniń málimetine súıensek, óńirde jergilikti polıtsııa qyzmeti quramynda týrıstik polıtsııa qurylǵan. Ondaǵy tártip saqshylarynyń negizgi mindeti - qıyn jaǵdaıǵa tap bolǵan týrısterge járdem kórsetý. Sondaı-aq olar týrıstik maýsym kezeńinde (15 maýsymnan 30 tamyzǵa deıin) Alakóldiń jaǵalaýynda týrıstik obektilerdiń aýmaǵyn patrýldep, týrısterdiń ómirin, múlkin qorǵaıdy. Búginde Alakól jaǵalaýynda 180-nen astam demalys orny men 65 qyzmet kórsetý jáne saýda obektisi ornalasqan.

«Qazirgi kúni týrıstik polıtsııa materıaldyq-tehnıkalyq turǵyda tolyqtaı qamtylǵan. Onyń ishinde baılanys jáne quqyq buzýshylyqtardy tirkeýdiń tehnıkalyq quraldary, qyzmettik avtokólikter jáne sýda qozǵalý quraldary bar.

Polıtsııa departamenti Alakól kóli jaǵalaýynda qoǵamdyq tártipti qamtamasyz etýge jyl saıyn qosymsha 50 qyzmetkerdi jáne 5 avtokólikti tartady», - delingen habarlamada.

Azamattardy qabyldaý jáne jetkizý úshin 5 statsıonarlyq beket jumys isteıdi. Týrıstik kezeń basynan beri 200-den astam ákimshilik quqyq buzýshylyq anyqtalǵan.