18 myń ınternet-alaıaqtyq qylmystyń 3 myńy ǵana ashylǵan – mınıstrlik túsindirmesi

ASTANA. QazAqparat – Jyl basynan elimizde 18 myń ınternet-alaıaqtyq qylmysy jasalsa, sonyń 3 myńy ǵana ashylǵan. Máseleniń mán-jaıyn QR Іshki ister mınıstrligi Krımınaldyq polıtsııa departamenti kıberqylmysqa qarsy kúres ortalyǵynyń basshysy Jandos Súıinbaı túsindirdi, dep habarlaıdy QazAqparat tilshisi.

«Internet-alaıaqtyq qylmystyń bir túri. Jalpy ár qylmysty ashýdyń óz ereksheligi bar. Tehnologııa damyǵan zamanda ınternet-alaıaqtyq jaı qylmys túrine jatpaıdy. Sebebi, qylmysker Qazaqstanda emes, shetelde otyryp isin tyndyra berýi múmkin. Aıtar bolsaq, qylmys shetelde jasalǵan jaǵdaıda biz ol elge saýal joldaımyz. Ol saýaldyń qaraý merzimi bar, ıaǵnı aqparat birden berilmeıdi. Ýaqyt kerek. Sondyqtan elimizde ınternet-alaıaqtyq qylmysy ashylmaı jatyr dep aıta almaımyz», - dedi Jandos Súıinbaı Ortalyq kommýnıkatsııalar qyzmeti alańynda ótken baspasóz máslıhatynda.

QR ІІM ókiliniń aıtýynsha, ár óńirde ınternet-alaıaqtyq qylmysyn ashý boıynsha bólimder jumys isteıdi.

«Ótken jyly elimizde 19 myń ınternet-alaıaqtyq qylmysy tirkelse, bıyl 18 myńǵa azaıdy. Sonyń ishinde 3 myńdaı qylmys túri ashyldy», - deıdi ol.

Spıkerdiń málimetinshe, ınternet-qylmystardyń árqaısysynyń óz ereksheligi bar.

Buǵan deıin Іshki ister mınıstrliginiń ókili túrmeden habarlasatyn alaıaqtardyń baryn rastaǵan edi.

Foto: ortcom.kz