18 mıllıonynshy qazaqstandyq qashan dúnıege keletini boljandy
«2017 jyldyń 1 aqpanyndaǵy jaǵdaıǵa sáıkes, Qazaqstan halqynyń sany - 17 mln 945 myń 300 adam. Onyń ishinde, 10 mln 305 myń 700 adam - qalada, 7 mln 639 myń 600 adam aýylda turady. Halyqtyń 48,4 paıyzy - er azamattar, 51,6 paıyzy - áıel azamattar»,-dep habarlady mınıstrliktiń baspasóz hatshysy Samal Ibraeva.
Onyń aıtýynsha, 2016 jyldyń 1 aqpanynan beri halyq sany 231 myń 500 adamǵa nemese 1,3 paıyzǵa ósken eken. Halyq sany azamattyq hal aktilerin tirkeý qujattarynda, sondaı-aq, kóshi-qon polıtsııasynyń málimetterine saı eseptelgen. Al, keıbir álemdik saıttardyń reıtıngterinde kóbine ortasha týý deńgeıi esepke alynyp, ózderiniń algorıtmderine saı daıyndalady, dep atap ótti baspasóz hatshy.
«Qazaqstan halqynyń sanyn anyqtaıtyn esepteýish BUU-nyń málimetterine súıene otyryp, qazir elimizde 18 mln halyq turatynyn kórsetken. Biraq, resmı statıstıkaǵa júginsek, halyq sany áli 18 mıllıonǵa jetken joq. Ázirshe, 1 aqpan boıynsha elimizdegi halyq sany 17 mln 945 myń shamasynda. Alla jazsa, 18 mıllıonynshy qazaqstandyq sáýir aıynda dúnıege keledi dep kútilýde»,-dep habarlady ol.