ShQO-daǵy 13 ýchaskede sel júrý qaýpi bar
Shyǵys Qazaqstanda mamyr aıynyń ortasynan sel qaýpi joǵary kezeń bastaldy. Óńirdegi Altaı, Katonqaraǵaı, Zaısan aýdandarynda jáne Rıdder qalasynda ornalasqan 13 ýchaskede sel qaýpi bar.
«Atalǵan aýdandardaǵy taýlardyń basynda 11 eldi mekenge qaýip tóndiretin 144 muzdyqty kól qalyptasady. Mamandar qaýipsizdik maqsatynda kólder muzdan áli ashylmaǵan sátten bastap sel qaýpi bar jaǵdaıdy baqylaý úshin aerovızýaldy tekserý júrgizýde», - dep habarlady ShQO Tótenshe jaǵdaılar departamentiniń baspasóz qyzmeti.
Budan bólek, oblysta syrǵyma qaýpi bar 9 ýchaske bar. Olar negizinen avtojoldardaǵy, ózen basseınderindegi taýlardyń jaǵalyq betkeıleri men quldılarynda ornalasqan.
«Sel jáne syrǵyma qaýpi bar kezeńniń qaýipsiz ótýine ázirlik maqsatynda Tótenshe jaǵdaılar departamenti «Qazseldenqorǵaý» MM Shyǵys Qazaqstan aýmaqtyq fılıalymen birlesip is-sharalar josparyn daıyndady. Ózen arnalary jáne sel, syrǵyma qaýipti ýchaskeleri boıynsha josparly jerústi jáne aerovızýaldy zertteý kestesi ázirlendi. Muzdyqty kólderde batımetrııalyq jumystar josparlanǵan. Sel qaýpi bar ýchaskelerde 20 eskertý jáne tyıym salý belgisi jáne syrǵyma qaýpi joǵary ýchaskelerde 18 qalqan ornatylǵan. Sel, syrǵyma jaǵdaıyna monıtorıng júrgizý úshin 9 maýsymdyq jáne 1 jyl boıǵy gıdropost jumys isteıdi», - delingen aqparatta.