1700 km jaıaý júrip ótken qart saıahatshy Almatyǵa jetti

ALMATY. QazAqparat – Ulytaýdyń 72 jastaǵy turǵyny Sársenbaı Qotyrashov búkil Qazaqstandy jaıaý aralap shyǵý nıetimen saparǵa shyqqan. Búgin ol 1 700 shaqyrymdy artqa tastap, Almatyǵa jetti. Bul - onyń josparly baǵytyndaǵy 17 qalanyń besinshisi, dep habarlaıdy QazAqparat tilshisi.

Saıahatshy Almatyda stýdenttermen kezdesti. Ol joldaǵy eń kúrdeli aýmaq – Jezqazǵan-Qyzylorda arasy men Tarazǵa deıingi taý asýlary bolǵanyn aıtty. Sondaı-aq, aýa raıy da kedergi keltiretinin jetkizdi. Degenmen, eshbir kedergige qaramastan, saparyn jalǵastyryp keledi.

Aqsaqal «Ulytaýda boldyń ba?» atty marafonǵa jeti jyl daıyndalypty. Qarasha aıynyń basyna deıin Qazaqstannyń 17 qalasyn aralap ótpek. Ol úshin jalpy alǵanda 8 000 shaqyrym júrýi kerek.

«Jolda kezdesken adamdar jıi toqtap, meni biraz jolǵa deıin jetkizip tastaýdy usyndy. Biraq, men ózime búkil qashyqtyqty jaıaý ótip shyǵamyn dep sert bergenmin. Men osy sertimdi saqtaýym kerek», - dedi Sársenbaı Qotyrashov.

Ol barlyq jerde adamdardyń qýanyshpen qarsy alyp, qoldaý bildirip jatqanyna rıza. Bul oǵan jiger syılaıtynyn aıtty. Qarjylaı da, azyq-túlikpen de kómek kórsetkender bolǵan.

Marafonshy Almatydan Qonaev, Taldyqorǵan, Aıagóz qalalaryna jol tartady, odan ári Aqtaýǵa jetýdi josparlap otyr.

«Men shetelde eshqashan bolǵan emespin. Osy sapardan soń, kelesi jyly Mekke men Medınaǵa jaıaý barýdy armandaımyn», - deıdi ol.

Aıtýynsha, týystary bastapqyda onyń bul saparyna qarsy bolǵan. Keıin qoldaý bildiripti. Ol mundaı marafonǵa qatysqysy keletinderde aıqyn maqsat pen myqty densaýlyq bolýy kerektigin atap ótti.

Aqsaqaldyń qoldaýshy toby da bar. Onymen birge Ulytaýdan Qyzylordaǵa deıin, Shymkentten Almatyǵa deıin top jetekshisi, ólketanýshy Bahtııar Qojahmetov erip júrdi.

«Meniń kómegim qandaı boldy? Men oǵan tańǵy as jasaýǵa kómektesem. 20 shaqyrymdy kólikpen júrip ótem, bul aralyqty ol shamamen túske deıin júrip ótý kerek. Sol jerde men shaıhana, kafe, as ishetin jerdi izdeımin. Eger olar tabylmasa, ózim oǵan túski asty daıyndaımyn. Aryqaraı osy shema boıynsha taǵy 20 shaqyrym júrem de, túnep shyǵatyn oryndy izdeımin», - dedi Bahtııar Qojahmetov.

Aıta keteıik, Ulytaý ulttyq tarıhı-mádenı jáne tabıǵı murajaı-qoryǵynyń qyzmetkeri, eńbek ardageri Sársenbaı Qotyrashov 31 naýryzda jolǵa shyqqan. Maqsaty – el turǵyndaryn Ulytaý aýdanynyń tarıhy jáne kıeli jerlerimen tanystyrý, sondaı-aq qolónershilermen kezdesý. Týǵan jeriniń atyn asqaqtatýdy óz mindeti sanaıdy. Ol sondaı-aq, qymyz meıramyn tanymal etkisi keledi.

«Sársenbaı ata saıahatynyń sońynda Prezıdentke «qymyz kúnin» jarııalaý, ony Naýryz, Aıt meıramymen qatar, jyl saıyn toılaý týraly hat jazǵysy keledi», - dedi Bahtııar Qojahmetov.

Buǵan deıin Ulytaýdan jaıaý shyqqan marafonshy aqsaqal Qyzylorda men kıeli Túrkistan shaharyna jetkeni týraly habarlanǵan bolatyn.