17 jastaǵy balalardy avtomatty túrge áskerı esepke qoıýdan 1 mlrd teńge únemdeledi

ASTANA. QazAqparat – 17 jasqa tolǵan balalardy áskerı esepke qoıýdy avtomattandyrý nátıjesinde jyl saıyn 1 mlrd teńge únemdeledi. Bul týraly Ortalyq kommýnıkatsııalar qyzmetinde ótken brıfıngide Qorǵanys mınıstriniń orynbasary Darhan Ahmedıev aıtty, dep habarlaıdy QazAqparat tilshisi.

«17 jasqa tolǵandardy jergilikti komıssarıattarǵa tirkeý protsesin keler jyldan bastap proaktıvti túrge aýystyryp jatyrmyz. Ózderińizge málim, 17 jasqa bolǵan balalardy tirkeýdi uıymdastyrýshylar avtobýstarǵa otyrǵyzyp, medıtsınalyq tekseristen ótý úshin aparatyn. Keıin olar birneshe anyqtama jınaıdy, jeke is qujattary bolady. Ol 10-nan astam qujattardyń kóshirmesin jasaıtyn. Bul biraz ýaqyt alatyn protses. Oǵan azamattardan bólek, mektep muǵalimderi men uıymdastyrýshylardyń da ýaqyty ketedi. Endi ony avtomatty túrge aýystyrsaq, kerek emes protsesterden arylamyz jáne jyl saıyn memlekettiń bıýdjettiń 1 mlrd teńgeden astam qarajatyn únemdeımiz», - dedi Darhan Ahmedıev.

Onyń aıtýynsha, keler jyldyń 1 qańtarynan bastap 17 jasqa tolǵan, áskerı mindetin óteýi tıis azamattar avtomatty túrde esepke qoıylady.