17 shilde. QazAqparat kúntizbesi
ESTE QALAR OQIǴALAR
1998 jyly Qazaqstan men Qyrǵyzstan Respýblıkalary arasyndaǵy memlekettik shekarany mejeleý týraly memorandýmǵa qol qoıyldy.
2006 jyly Qazaqstannyń Ulttyq banki «Qazaqstan petroglıfteri» serııasy boıynsha «Kúıme» degen ataýmen kollektsııalyq kúmis shaqany satylymǵa shyǵardy.
Shaqanyń dızaınynda bizdiń dáýirimizge deıingi ІІ myńjyldyqtyń ekinshi jartysynan bizge jetken «Kúıme» petroglıfiniń detali qoldanylǵan. Nomınaly 500 teńgelik shaqa 3 myń danamen shyǵarylǵan, olardyń árqaısysynyń baǵasy – 3 myń teńge. Bul moneta – «Qazaqstan petroglıfteri» serııasy boıynsha shyǵarylyp otyrǵan jetinshi shaqa. Onyń salmaǵy – 24 gramm, dıametri – 37 mm. Sapa sertıfıkatyna ıe.
2013 jyly Pavlodardaǵy Oqýshylar saraıynyń «Bleız» estradalyq bı stýdııasynyń ujymy Ispanııanyń Lloret de Mar qalasynda ótken «Teńiz, kún, festıval» halyqaralyq baıqaýyna qatysty. Baıqaýda Eýropa jáne Azııa elderiniń balalar-jasóspirimder ujymdary óner kórsetti.
«Asaý sezim» kompozıtsııasy men 6-18 jastaǵy 47 bıshi qatysqan «Biz birgemiz!» horeografııalyq nómiri úshin «Bleız» stýdııasyna eki atalym boıynsha bas júlde tabys etildi.
2016 jyly Qazaqstanda jarǵylyq kapıtaly 100 paıyz memleketke tıesili «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy quryldy.
2016 jyly Gonkongta ótken matematıka páni boıynsha olımpıadada pavlodarlyq Ámir Muhammed Álı altyn medalǵa ıe boldy.
2019 jyly Qazaqstan Respýblıkasy Prezıdenti janyndaǵy Ulttyq qoǵamdyq senim keńesi quryldy. Onyń qyzmetiniń negizgi maqsaty – qoǵam, saıası partııalar, azamattyq qoǵam ókilderiniń qatysýymen keńinen talqylaý negizinde memlekettik saıasattyń ózekti máseleleri boıynsha usynystar men usynymdar ázirleý.
2019 jyly Beıneý aýdanynyń Tájen aýylynda «Beıneý-Aqjigit-Ózbekstan Respýblıkasy» baǵytyndaǵy respýblıkalyq mańyzy bar avtokólik jolynyń ashylý rásimi ótti. Saltanatty sharaǵa qatysqan Qazaqstan Respýblıkasynyń Premer-Mınıstri Asqar Mamın avtokólik jolynyń ashylýymen quttyqtap, onyń Ortalyq Azııadaǵy kólik ınfraqurylymyn damytý, saýda kólemin ulǵaıtý jáne tranzıttik áleýetti iske asyrýdaǵy mańyzyn atap ótti.
2020 jyly otandyq kınoındýstrııany qoldaý men damytýǵa baǵyttalǵan ortaq kúshterdi belsendirý maqsatynda ulttyq kınony qoldaý memlekettik ortalyǵy men «Qazaqfılm» AQ birikti.
Endi sala úshin mańyzdy sheshimder birge qabyldanady, problemalyq máseleler boıynsha ortaq sheshim shyǵarylyp otyrady, al jumys ár taraptyń múddeleri men usyna alatyn ózara kómegi negizinde júrgiziledi.
2020 jyly Kaırde «Abaıdyń Qazaq halqyna ósıetteri» atty arab tilindegi kitap jaryq kórdi. Mysyrlyq ǵalym óz eńbeginde qazaqtyń uly aqyny jazǵan «Qara sózderiniń» maǵynasyn, olardyń fılosofııalyq mánin, ulttyq tárbıe men dúnıetanym, moral men quqyq máselelerine kózqarasyn túsindirýge tyrysqan.
Bul Haled as-Saıd Ǵanemniń Abaı murasyna qatysty jáne jalpy Qazaqstan týraly alǵashqy kitaby emes. 2014-2017 jyldary ol «Nur-Múbarak» Qazaqstan-Mysyr ıslam mádenıeti ýnıversıtetinde oqytýshy bolyp jumys istedi jáne qazaq halqynyń tarıhy, dini jáne mádenıeti týraly kóptegen ǵylymı eńbekter jazdy.
2021 jyly Qazaqstan Elshiliginde Vetnam aýdarmashylary tobynyń jetekshisi Doan Zan Ngıepke kórnekti qazaq aqyny jáne oıshyly Abaı Qunanbaevtyń «Qara sózderi» kitabyn vetnam tiline aýdarǵany úshin QR Prezıdenti Qasym-Jomart Toqaevtyń Alǵys hatyn tapsyrý rásimi ótti.