17 ota jasalyp, 160 naýqasqa keńes berildi – PІB Medortalyǵynyń Shymkenttegi kúnderi
Osy aptada QR Prezıdenti Іs Basqarmasy Medortalyǵynyń kúnderi aıasynda elordadaǵy aýrýhana men Ortalyq klınıkalyq aýrýhanasynyń, «Oqjetpes» emdeý-saýyqtyrý kesheniniń, Sanıtarlyq-epıdemıologııalyq saraptama ortalyǵynyń, Joǵary tehnologııalar jáne aqparattyq júıeler ortalyǵynyń mamandarynan, sondaı-aq «Qarlyǵash» balabaqshalar jelisiniń pedagogterinen jasaqtalǵan delegatsııa Shymkent qalasyna bardy.
Medıtsınalyq ortalyqtyń óńirlerdegi kúnderin ótkizýdegi basty maqsat – dárigerler men pedagogterdiń biliktiligin arttyrý, tájirıbe almasý, medıtsınalyq týrızmdi damytý.
Úsh kún ishinde Medortalyq aýrýhanalarynyń dárigerleri 160-qa jýyq tegin konsýltatsııalyq kómek berdi. Qala turǵyndaryn joǵary bilikti arıtmolog, genetık, onkolog jáne onkohırýrg, gastroenterolog, pýlmonolog, neırohırýrg jáne kardıohırýrg mamandar qabyldady. Olar kúrdeliligi ártúrli 17 operatsııa jasady.
Shymkent saparynyń baǵdarlamasynda dárigerler men muǵalimderge arnalǵan trenıngter men sheberlik sabaqtary da qamtylǵan bolatyn. Sonyń aıasynda Medıtsınalyq tehnologııalar jáne aqparattyq júıeler ortalyǵynyń delegatsııasy №1 qalalyq klınıkalyq aýrýhana dárigerlerimen kezdesý ótkizdi.
QR PІB Medortalyǵynyń «Qarlyǵash» balabaqshasynyń ókilderi Shymkent qalasyndaǵy mektepke deıingi uıymdardyń qyzmetkerlerine dóńgelek ústel uıymdastyrdy. Kezdesýde elordalyq pedagogter oqytý ádisteri men balalardyń densaýlyǵyn saqtaýǵa jáne jaqsartýǵa qatysty tájirıbelerimen bólisip, «Bilim berý sapasyn baǵalaýda ECERS-3 shkalasyn qoldaný» taqyrybynda semınar-trenıng, «Innovatsııalar salasyndaǵy ınnovatsııalar» taqyrybynda sheberlik sabaǵyn ótkizdi.
Sanıtarııalyq-epıdemıologııalyq saraptama ortalyǵy qalanyń medıtsınalyq uıymdarynyń bas dárigerleri men orynbasarlaryna epıdemıologııalyq jáne azyq-túlik qaýipsizdigi boıynsha, aýrýhanada ınfektsııanyń aldyn alý jáne baqylaý jaıynda trenıngter men sheberlik sabaqtaryn ótkizdi.
Іs-sharanyń sońǵy kúninde QR PІB Medıtsınalyq ortalyǵy men Shymkent qalasynyń ákimdigi, Ońtústik Qazaqstan medıtsına akademııasy jáne Santo farmatsevtıkalyq kompanııasy arasynda yntymaqtastyq týraly memorandýmdarǵa qol qoıyldy.
Eske salsaq, QR Prezıdentiniń Іs Basqarmasy Medıtsınalyq ortalyǵy bıyl elimizdiń barlyq óńirlerimen arada áriptestik baılanysty nyǵaıta túsýge basa mán berip otyr. Bul qadam Medortalyqtyń Aqtóbe oblysyndaǵy kúnderin ótkizýden bastaý aldy.