17 qyrkúıek. Jylnama
Dúnıejúzilik patsıentter qaýipsizdigi kúni
Resmı túrde 2019 jyldyń mamyr aıynda Jenevada ótken Dúnıejúzilik densaýlyq saqtaý assambleıasynyń 72-shi sessııasynda bekitildi.
ESTE QALAR OQIǴALAR
1930 jyly «Kolhoz joly» degen ataýmen qazirgi «Kókshetaý» qalalyq gazeti shyǵa bastady. Gazet oblystyń ekonomıkalyq, áleýmettik saladaǵy jetistikterin nasıhattaǵany úshin úsh márte Búkilodaqtyq shyǵarmashylyq baıqaýdyń laýreaty atanǵan. 1980 jyly gazet «Qurmet belgisi» ordenimen marapattalǵan. 1990 jyldyń qańtar aıynan bastap «Kókshetaý» degen atpen shyǵa bastady.
2007 jyly Memleket basshysy «Kaspıı», «Tobyl» jáne «Batys» áleýmettik-kásipkerlik korporatsııalaryn qurý jáne olardyń qyzmetterin qamtamasyz etý jónindegi sharalar týraly» Jarlyqqa qol qoıdy.
2010 jyly Qazaqstan Úkimeti men BUU-nyń arasynda Birikken Ulttar Uıymynyń tólqujat ıelerin vızalyq talaptardan bosatý týraly kelisimge qol qoıyldy. Qazaqstan ózderinde BUU-nyń qyzmetkerleri úshin vızasyz rejımdi qabyldaǵan 26 eldiń tobyna qosyldy.
2010 jyly qazaqstandyq týrızmdi damytý aıasynda Almatydan soltústik batysqa qaraı 170 shaqyrym aımaqta ornalasqan ashyq aspan astyndaǵy «Tańbaly» mýzeı-qoryǵynyń aýmaǵynda abattandyrý jumystary bastaldy.
«Tańbalynyń» týrısterdi tartatyn basty ereksheligi tasqa qashap jazylǵan sýret eskertkishter, petroglıfter. Mýzeı-qoryqtyń tarıhı, mádenı jáne ǵylymı mańyzy orasan zor. Mundaǵy qol dáýirinen qazirgi kezge deıingi 100-den astam tarıhı eskertkishter tutas arheologııalyq keshendi quraıdy.
2010 jyly Qostanaıda Aleksandr Sergeevıch Pýshkınniń eskertkishi ashyldy. Uly aqynnyń músinin Qazaqstanǵa Reseı Jazýshylar odaǵy tartý etti. Qola músinniń avtory - músinshi Nıkolaı Kýznetsov-Mýromskıı.
2011 jyly Baıanaýylda (Pavlodar oblysy) XVII-XVIII ǵasyrdyń memleket qaıratkerleri Shoń bı Edigeuly men Shorman bı Kúshikulyna eskertkish ashyldy.
2012 jyly Qazaqstan Respýblıkasy Sýretshiler odaǵynyń múshesi, sýretshi-grafık Aleksandr Erashov «Úzdik adamdar» halyqaralyq entsıklopedııasynyń keıipkeri atandy.
2016 jyly qazaqstandyq boksshy Qanat Islam Qazaqstandy álemge tanytýǵa qosqan eleýli úlesi úshin Baýyrjan Momyshuly atyndaǵy «Namys» medalimen marapattaldy.
2019 jyly N.Nazarbaevtyń «Rýhanı jańǵyrý» memlekettik baǵdarlamasy men «Uly dalanyń jeti qyry» maqalasyn iske asyrý maqsatynda qazaqstandyq delegatsııa uly oıshyl Ábý Násir ál-Farabıdiń 1150-jyldyǵyn merekeleý qarsańynda Sırııadaǵy Damask qalasyna sapar jasady.
Sapardyń maqsaty – mádenı-tarıhı ortalyqpen, qazaqstandyq tarap salǵan ál-Farabı kesenesimen tanysý, 2020 jyly úly oıshyldyń 1150-jyldyǵyna daıarlyq jáne taǵy basqa kóptegen máselelerdi talqylaý.
2019 jyly Atyraý halyqaralyq áýejaıy alańynda qazaqtyń tuńǵysh ushqysh qyzy, Halyq qaharmany Hıýaz Dospanovaǵa arnalǵan eskertkish ashyldy. 1922 jyldyń 15 mamyrynda Atyraý oblysynda dúnıege kelgen Hıýaz - Ekinshi dúnıejúzilik soǵysta erligimen tanylǵan, al soǵystan keıin qaıratkerligimen daralanǵan qazaqtyń qaharman qyzy. Onyń erligine bas ıgen jerlesteri áýejaı aldynda batyrǵa arnalǵan eskertkish ornatý týraly bastama kótergen bolatyn. Eskertkishtiń bıiktigi – 2 metr 30 santımetr. Qoladan quıylǵan eskertkishte Hıýaz Dospanovanyń soǵysqa attanǵan boıjetken qalpy saqtalǵan.
2021 jyly qazaqstandyq dıdjeı Imanbek Zeıkenov Reseıdiń GQ jýralynyń jyl saıynǵy syılyǵynda «Jyl jańalyǵy» atalymynda jeńiske jetti.
2021 jyly Qazaqstanda Eýrazııa ekologııalyq qory quryldy, ol kógaldandyrý, bıoalýantúrlilikti saqtaý jáne aýmaqtardyń shóleıttenýine qarsy kúres jónindegi jobalardy damytady.
2021 jyly Belgııada Qazaqstan Táýelsizdiginiń 30 jyldyǵyna oraı poshtalyq markalar shyǵaryldy. Alǵashqy mereıtoılyq danalar Eýropalyq parlamenttiń, Eýropalyq komıssııanyń, sondaı-aq Belgııa Koroldiginiń memlekettik qurylymdary men uıymdarynyń ókilderine berildi.
2023 jyly Qazaqstan Prezıdenti Qasym-Jomart Toqaev Citigroup bas atqarýshy dırektory Djeın Freızermen kezdesti. Kezdesý barysynda amerıkalyq qarjylyq holdıngtiń elimizdegi qyzmetin keńeıtý perspektıvalary talqylandy. Citibank Kazakhstan Qazaqstandaǵy jalǵyz amerıkalyq bank jáne halyqaralyq ınvestorlar, memlekettik sektor jáne iri kásiporyndar úshin jetekshi seriktesterdiń biri sanalady.