163 adam jaraqattandy: Tashkentte qoımadaǵy jarylystyń sebebi ataldy

<p>Ózbekstannyń úkimettik komıssııasy 28 qyrkúıek kúni túnde Tashkenttegi logıstıka ortalyǵynda bolǵan jarylystyń aldyn ala sebebin jarııa etti, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Tergeý barysynda jarylys oryn alǵan qoımada hımıkattardyń kóp mólsheri, qurylys zattary men ózge de buıymdar belgilengen talap saqtalmaı, aralas jatqany anyqtaldy. Oqıǵa ornynan alynǵan úlgilerge negizdelgen hımııalyq zertteý qoımada polıefır, ksılol, kómirsýtegi, natrıı gıdroksıdi, sýtegi totyǵy, etılenglıkol jáne joǵary molekýlaly kómir qyshqyldarynyń efırleri sııaqty hımııalyq zattardyń bolǵanyn kórsetti.

«Bul zattar qoımada saqtalǵan sýtegi totyǵy, alkıd shaıyry, alkılbenzolsýlfon qyshqyly, lateks, polıefır shaıyry, kaýstıkalyq soda jáne boıaý ónimderiniń quramdas bólikteri sanalady ári órt qaýpi jáne jarylys qaýpi bar. Jarylys qaýpi bar zattardyń ózara árekettesýi saldarynan qoımadaǵy materıaldar hımııalyq jolmen ózdiginen janyp, jarylystyń sebebine aınalǵan», - delingen komıssııa qorytyndysynda.

Tótenshe oqıǵa saldarynan 300-ge jýyq kóppáterli turǵyn úıdegi 1 370 páterdiń qasbeti, terezeleri, esikteri, shatyrlary zaqymdandy. Jalpy shyǵyn 14,5 mlrd somdy quraıdy.

Jarylystan 163 adam zardap shekti. Onyń 150-i jeńil, 13-i aýyr jaraqat aldy. Kámeletke tolmaǵan bir bala aýyr jaraqattan kóz jumdy.

Ózbekstan ІІM Teregý komıteti Qylmystyq kodekstiń 259-baby 2-tarmaǵynyń «a» jáne «b» tarmaqshalary boıynsha qylmystyq is qozǵady.

Esterińizge sala ketsek, 28 qyrkúıekke qaraǵan túni Tashkenttiń Sirgeli aýdany «Qurylysshylar» fılıalyndaǵy «Inter Logistics» jaýapkershiligi shekteýli seriktestigine tıesili qoımada kúshti jarylys bolǵan edi.