16 jasar tennısshi Qazaqstan spartakıadasynyń absolıýtti chempıony atandy

ASTANA. QazAqparat – Astanadaǵy «Dáýlet» tennıs ortalyǵynda eresekter arasynda Qazaqstannyń VІ jazǵy spartakıadasy máresine jetti, dep habarlaıdy QazAqparat tilshisi.

Qazaqstan tennıs federatsııasynan málim etkendeı, jarysqa Astana, Almaty, Shymkent, Kókshetaý, Temirtaý, Semeı, Óskemen qalalary men Aqtóbe, Túrkistan, Qaraǵandy, Qyzylorda oblystarynan 100-den astam oıynshy qatysyp, baq synady.

Áıelder arasynda 16 jasar almatylyq Polına Sleptsova aıdy aspanǵa shyǵaryp, fınalda álemniń 500-raketkasy, shymkenttik Gózal Aınıtdınovany jeńdi – 6:1, 3:2 (budan keıin Gózal básekeni jalǵastyrýdan bas tartty).

Qola júlde úshin jekpe-jekte almatylyq Asyljan Arystanbekova astanalyq Ýlıana Romanovany qapy qaldyrdy – 6:4, 6:2.

Juptyq synda Polına men Asyljan elordalyqtar Ý.Romanova – Arýjan Saǵyndyqovany oısyrata utty – 6:1, 6:1. Aqtóbelikter Ámire Qaztýǵan men Zınıra Júnisova qola júldeger atandy.

Erler arasynda sońǵy básekede qyzylordalyqtar Tımýr Máýlenov pen Erasyl Erdildá altyn úshin talasty. Erasyl jasyraq bolǵanymen, Tımýr dopty jaqsy berip, senimdi oınady – 6:3, 6:4.

Bıyl elimizdiń qysqy chempıonatynda T.Máýlenov úzdik shyqqan edi. Spartakıadanyń qola medali temirtaýlyq Grıgorıı Lomakınge buıyrdy.

Esep 6:0 bolǵannan keıin qarsylasy, almatylyq Nıkıta Sıdorov básekeni jalǵastyrýdan bas tartty.

Juptyq synda fınalda almatylyqtar Danııl Felker – Nıkıta Sıdorovtan aılasyn asyrǵan G.Lomakın men qaraǵandylyq Vıtalıı Zatsepın jeńimpaz atandy. Qola júlde T.Máýlenov pen E.Erdildániń enshisinde.

Jalpykomandalyq esepte almatylyqtar ozyp shyqsa, qyzylordalyqtar – ekinshi, astanalyqtar úshinshi orynǵa kóterildi.

Eske sala keteıik, budan buryn Ýımbldonda Elena Rybakınany jeńgen Ons Jaberdiń fınalǵa shyqqanyn jazǵan bolatynbyz.