16 kásiporynda zııandy shyǵaryndylardy azaıtýǵa 565 mlrd teńge baǵyttalady –mınıstr

NUR-SULTAN. QazAqparat – Qazaqstandaǵy 16 kásiporynda zııandy shyǵaryndylardy azaıtý úshin 500 mlrd teńgeden astam ınvestıtsııa baǵyttalady. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtyp berdi, dep habarlaıdy QazAqparat tilshisi.

«Aıtyp ótkenimdeı, 10 qaladaǵy lastanýdyń joǵary deńgeıi ónerkásiptik kásiporyndardyń qyzmetine baılanysty. «Jasyl Qazaqstan» ulttyq jobasy aıasynda 16 kásiporynmen shyǵaryndyny orta eseppen 33 paıyzǵa tómendetý kózdelýde. Oǵan 565 mlrd teńge jeke ınvestıtsııalar baǵyttalady», - dedi mınıstr Úkimet otyrysynda.

Mınıstrdiń aıtýynsha, bul jumystan basqa jeke sektordy da, sol sııaqty sharýashylyq júrgizýshi sýbektilerdi de gazdandyrý nemese balamaly energııa kózderine aýystyrý, qoǵamdyq kólikti gazǵa nemese elektr kóligine aýystyrý jumystaryn da júrgizý qajet.

Buǵan deıin Serikqalı Brekeshev kómirtegi beıtaraptyǵyna qol jetkizý jumystaryn baıandaǵan edi.

«Qazaqstan 2030 jylǵa deıin parnıktik gaz shyǵaryndylaryn 1990 jylǵy deńgeıden 15 paıyzǵa qysqartýǵa nıetti. 2019 jyly parnıktik gazdardyń ulttyq shyǵaryndylary 1990 jylǵy deńgeıden 2,4 paıyzǵa tómen. Qazir qazaqstandyq delegatsııa klımattyń ózgerýi boıynsha Glazgoda ótip jatqan sammıttiń 26-sessııasyna belsendi qatysýda. Atap aıtqanda, 26-y SOR sheńberinde Qazaqstan «Orman jáne jerdi paıdalaný» deklaratsııasyna jáne de Bilim men jastardy tartý mindettemesine qosyldy», - dedi mınıstr.