1500-ge jýyq qazaqstandyq áskerı mamandyq boıynsha daıarlyqtan ótedi (FOTO)

ASTANA. QazAqparat - Qazaqstan Qarýly Kúshterinde áskerı mindettilerdiń jıyny bastaldy. Olar áskerı bólimderde bilim alyp, ony Qarýly Kúshterdiń jaýyngerlik jáne jumyldyrý daıarlyǵyn arttyrý maqsatynda jetildiretin bolady, dep habarlaıdy QR QM baspasóz qyzmeti.

Eki apta boıy jasy qyryqqa tolmaǵan jalpy sany 1 500 qazaqstandyq áskerı qyzmetshi áskerı bólimder men mekemelerde qyzmet etedi. Jıynǵa shaqyrylǵan barlyq áskerı mindettiler QR Qorǵanys mınıstrliginiń esebinen tamaqpen jáne zattyq múlikpen qamtamasyz etiledi.

Budan ózge, jıynǵa shaqyrylǵan áskerı mindettilerge barlyq kezeń úshin jáne olardyń áskerı bólimge deıingi jáne keri qaıtatyn joly qosa eseptelinip, respýblıkalyq bıýdjet esebinen ortasha aılyq jalaqy tólenedi, sondaı-aq jumys orny, atqaratyn laýazymy saqtalady.

Jıyn aıaqtalǵannan keıin olar áskerı-esep mamandyqtary men laýazymdaryna sáıkes jıynnyń oqytý baǵdarlamasy boıynsha meńgergen bilimderin rastaý úshin emtıhandar men synaqtar tapsyrady. Bul jıynǵa qatysýshylar ishinde - zapastaǵy ofıtserler, serjanttar men sarbazdar bar. Jıyn barysynda áskerı mindettiler qaıta daıarlyqtan ótip, áskerı bilimderin jetildiredi.