«150» senim telefony: Balalarǵa qatysty qandaı shaǵymdar jıi túsedi

ASTANA. QazAqparat - Mamandar balalarǵa arnalǵan «150» ulttyq senim telefonynyń jumysy týraly jáne oǵan qandaı ótinishterdiń jıi túsetindigi týraly aıtyp berdi, dep habarlaıdy «QazAqparat» HAA tilshisi.

Balalarǵa arnalǵan «150» táýelsiz senim telefonyna jyl saıyn 9 myń qońyraý túsedi. Onyń jumysynyń negizgi maqsaty - balanyń kez kelgen ýaqytta habarlasyp, oǵan yńǵaıly tilde sóılesýine múmkindik beredi. Erejege sáıkes, eger bala ózine qol jumsaıtynyn málimdegen jaǵdaıda, maman kem degende 1 saǵat 20 mınýt sóılesýi kerek. Ortalyqta áńgimelesý júrgiziletin keste bar.

«Balalar qoldaýǵa ıe bolyp jatyr. Jańa jylǵa deıin bir qyz habarlasyp, taqpaq aıtyp berdi. Ol ne úshin 150 telefonyna habarlasty? Sebebi ony úıinde eshkim tyńdamaıdy. Jyl sanap qońyraýlar sany ósip jatyr», - dedi «Krızıstik ortalyqtar odaǵy» zańdy tulǵalar birlestiginiń atqarýshy dırektory Dana Anışenko.

«Taldyqorǵan óńirlik áıelderge qoldaý kórsetý ortalyǵy» qoǵamdyq birlestiginiń prezıdenti Janar Nurmuhanovanyń aıtýynsha, balalardyń kámelettik jasqa tolmaı, organdarǵa tek zańdy ókilderinsiz jáne/nemese qamqorshylarynsyz ótinish bildire almaýy qıyndyq týdyrady.

«Almaty oblysynda 2 jyldyń ishinde balalardan shaǵym az túsken, negizinen ata-analary keledi. Biz ózimizdiń tarapymyzdan aqparattyq jumystar júrgizip jatyrmyz», - dep atap ótti Janar Nurmuhanova.