15 jyl buryn joǵalǵan úsh jasar qyzdy urlaǵan kúdikti ustaldy

NUR-SULTAN. QazAqparat - Osydan týra 15 jyl buryn brıtandyq dárigerlerdiń 3 jasar qyzy Madlen Makkann Portýgalııanyń Praııa-da-Lýsh kýrortyndaǵy páterden iz-túzsiz joǵalyp ketken. Ol áli kúnge deıin habar-osharsyz ketkender sanatynda, biraq erteń istiń eskirý merzimi aıaqtalady, demek is jabylýy kerek, dep habarlaıdy QazAqparat Euronews-ke silteme jasap.

Eger portýgal prokýrorlary ótken aıda kúdiktige resmı aıyp taqpaǵanda is tolyǵymen jabylatyn edi.

Bul - 45 jastaǵy Germanııa azamaty Krıstıan Brıýkner. Ol 2007 jyly búldirshin joǵalǵan jerge kórshiles Algarvede bolǵan.

«Kez kelgen jaǵdaıda, meıli ol urlaý nemese kisi óltirý bolsyn, qylmystyń eskirý merzimi - 15 jyl. Al eger tergeý osydan eki apta buryn alǵa jyljymaǵanda, qylmystyq isti qaraý merzimi osy sársenbide biter edi. Endi ony 22 jylǵa, tipti 26 jylǵa deıin uzartýǵa bolady», - dedi advokat Manýel de Magalıaesh e Sılva.

Qyzynyń joǵalyp ketkenine 15 jyl tolýyna oraı jasaǵan málimdemesinde Keıt pen Djerrı Makkann brıtandyq, portýgalııalyq jáne nemis polıtsııasyna alǵys aıtyp, qylmysty ashýǵa jumsaǵan kóp jylǵy talpynys aqyry óz jemisin beretinine úmit bildirdi.

Qyzdy tabý úshin tólengen syıaqy birneshe mıllıon dollarǵa jetti.

Kýágerlerdiń aıtýynsha, olar ony Avstralııaǵa deıin ártúrli jerlerde kórgen. Basty kúdiktiniń ózi qyzdyń joǵalýyna esh qatysy joq ekenin aıtyp otyr.