15 joǵary oqý orny HR salasy boıynsha mamandar daıarlaýda

ASTANA. QazAqparat – QR Prezıdentiniń janyndaǵy Memlekettik basqarý akademııasynda personaldy basqarý qyzmetteriniń ókilderi úshin tıisti oqytý kýrstary ótkiziledi. Bul týraly Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi.

«Qazir QR Prezıdentiniń janyndaǵy Memlekettik basqarý akademııasyn qosa alǵanda, Qazaqstanda 15 joǵary oqý orny HR salasy boıynsha maman daıarlaıdy. Sonyń ishinde bakalavr deńgeıinde – 8, magıstratýra deńgeıinde – 10 bilim berý baǵdarlamasy bar», - dedi D. Jazyqbaev elordada ótip jatqan «Memlekettik qyzmettegi HR: personaldy strategııalyq basqarýǵa kóshý» forýmynda.

Onyń aıtýynsha, agenttikti tolyqqandy strategııalyq HR ınstıtýtqa aınaldyrý maqsatynda atalǵan akademııanyń joǵary áleýeti eskerilip, ol keleshekte adamı resýrstardy daıarlaý, olardyń biliktiligin arttyrý boıynsha ǵylymı-zertteý ortalyǵy bolmaq.

«Akademııada personaldy basqarý qyzmetteriniń ókilderi úshin tıisti oqytý kýrstary ótkizilip, olar sertıfıkattalatyn bolady. Josparlanǵan kýrstar bolashaqta HR-qyzmetterin túrlendirip, joǵary áleýeti men suranysy bar talanttar – HR kásipqoılar pýlyn qurýǵa múmkindik beredi. Jalpy, memlekettik qyzmet salasyndaǵy ózgerister adam resýrstaryn tıimdi paıdalaný arqyly kásibı memlekettik apparat qalyptastyryp, qoǵamnyń talaptaryn qanaǵattandyrý men halyqtyń ál-aýqatyn arttyrýǵa baǵyttalǵan», – dep atap ótti Darhan Jazyqbaev.

Budan buryn habarlanǵandaı, memlekettik qyzmetke ornalasýda konkýrstyq rásimdi ótkizý formaty qaıta qaraldy.