15 jastaǵy qyz zorlanǵan Jetisý oblysynyń aýdanynda polıtsııa jasaqtary kúsheıtildi
«Panfılov aýdanynyń Sholaqaı aýylynda kámeletke tolmaǵan balany zorlaý jáne óltirý faktisi boıynsha tergeý jumystary oblystyq polıtsııa departamenti basshylyǵynyń erekshe baqylaýyna alyndy.
Asa aýyr qylmys jasady degen kúdikti anyqtalyp, qamaýǵa alyndy. Tergeý barysynda kúdikke iligip, ustalǵan jergilikti turǵynnyń 1984 jyly týǵany jáne buǵan deıin qylmystyq jaýapkershilikke tartylǵany anyqtaldy. Sondaı-aq onyń aıýandyqpen jasaǵan qylmysynyń izderin jasyrý maqsatynda máıitti órteýge tyrysqany belgili boldy. Atalǵan derek boıynsha QR QK 99-baby 2-bóligi (Adam óltirý), 10-tarmaǵy (basqa qylmysty jasyrý maqsatynda) jáne 14-tarmaǵy (kórineý kámeletke tolmaǵan adamdy óltirý), sondaı-aq QR QK 120-baby 3-bóligi 1-tarmaǵy (kámeletke tolmaǵan adamdy zorlaý) boıynsha sotqa deıingi tergeý amaldary júrgizilip jatyr. Qazaqstan zańnamasynyń talaptaryna sáıkes asa aýyr qylmysy úshin ol ómir boıyna bas bostandyǵynan aıyrylýy múmkin»,- delingen Jetisý oblysy Polıtsııa departamentiniń habarlamasynda.
Vedomstvonyń aqparatyna sáıkes, atalǵan qylmysty oblystyq departamenttiń qyzmetkerleri men Panfılov aýdanynyń polıtseıleri birlesip áshkereledi. Qazirgi ýaqytta bolǵan oqıǵanyń barlyq mán-jaıyn anyqtaý maqsatynda tergeý is-sharalary tolyqqandy júrgizilýde. Derek boıynsha qajetti saraptamalar taǵaıyndaldy. Jábirlenýshi taraptyń jasóspirim qyzdyń ólimine basqa da adamdardyń qatysy bolýy múmkin degen paıymy eskerilip, sotqa deıingi tergeý barysynda kúmán týdyrǵan jaıttar jan-jaqty tekserilmek.
«Tergeý jumystaryna oblystyq polıtsııanyń tergeý basqarmasyndaǵy eń tájirıbeli qyzmetkerler jumyldyryldy», - dedi vedomstvodan.
Málim etilgendeı, qazir Panfılov aýdanynda polıtsııa jasaqtary kúsheıtilgen jumys rejımine kóshirildi.
«Aıta keteıik, áleýmettik jelilerde osy derekke qatysty jalǵan aqparat toqtaýsyz taratylyp jatyr. Bul úrdis qoǵamdyq kóńil-kúıdi buzyp, quqyq qorǵaý organdaryna senimsizdik týdyrýda. Osyǵan oraı, qoldanystaǵy zańnamaǵa sáıkes kórineý jalǵan aqparat taratqany úshin jaýapkershilik qarastyrylǵanyn eskertemiz jáne azamattardan tek resmı derek kózderine senim bildirýin suraımyz.
Sondaı-aq týystarynyń kámeletke tolmaǵan qyzdy óz betinshe izdeý jumystarynyń nátıjesi bolmaǵannan keıin polıtsııanyń kómegine júgingeni jáne tártip saqshylary jasóspirim qyzdyń iz-túzsiz joǵalǵany týraly derekti dereý tirkep, izdeý amaldaryna kiriskenin atap ótemiz.
Sonymen qatar týyndaǵan qoǵamdyq rezonansqa baılanysty Panfılov aýdanynda polıtsııa jasaqtary kúsheıtilgenin habarlaımyz. Eldi mekenderdegi quqyqtyq tártip baqylaýǵa alyndy»,- dep tolyqtyrdy atalǵan vedomstvonyń baspasóz qyzmetinen.
Eske salaıyq, Panfılov aýdanynyń Sholaqaı aýylynda 15 jastaǵy oqýshy qyzdy 38 jastaǵy er adam zorlap, óltirdi degen kúdikpen ustalǵanyn habarlaǵan bolatynbyz.