15 jasar oqýshy «Shahmat kerýeni» týrnıriniń fınalyna joldama aldy
Tuńǵysh Prezıdent alańynda uıymdastyrylǵan merekelik shara kezinde Qazaqstan shahmat federatsııasynyń oblystyq fılıaly ashylyp, onyń tóraǵalyǵyna Oral qalasynyń ákimi Mırjan Satqanov taǵaıyndaldy.
Jarystyń ashylý saltanatynda sóz sóılegen BQO ákimi Narıman Tóreǵalıev elimizde 900-ge jýyq adam shahmattan halyqaralyq reıtıngke ıe bolsa, onyń 15-i grossmeıster ataǵyn alǵanyn jetkizdi.
«Oblysymyzda 9 myńǵa jýyq adam turaqty túrde shahmatpen aınalysady. 500-ge jýyq bala shahmat sektsııalaryna qatyssa, olarǵa baǵyt beretin 20 bilikti jattyqtyrýshy bar. Jyl saıyn shahmattan aýdandyq, oblystyq týrnırler uıymdastyrylady. Búginde ıntellektýaldy oıynǵa úlken qyzyǵýshylyq tanytyp, shahmat sektsııalaryna jazylǵysy keletin balalardyń sany artyp keledi», – dedi óńir basshysy.
Merekelik is-sharadan soń mobıldi kıiz úıde shveıtsarlyq júıe boıynsha 11 kezeńnen turatyn blıtsten týrnır boldy. Onda oblystyq irikteýden ótken 20 adam ózara baq synasyp, úsh jeńimpaz 10 qarashada Túrkistanda bolatyn grand-fınalǵa joldama aldy.
1-oryn – Tórehan Molbaı (100 myń teńge);
2-oryn – Dmıtrıı Danılov (50 myń teńge);
3-oryn – Mıras Rýshanov (30 myń teńge).
«Frıdom Fınans» AQ-nyń Oraldaǵy fılıalynyń dırektory Baýyrjan Muhambetov fınalısterdiń jolaqysy men syıaqylary kompanııa atynan qarjylanatynyn aıtty.
«Shahmatty 4 jasymda ákemnen úırendim. 8 jyldan beri turaqty aınalysyp kelemin. Búgin týrnırde oblystyń 20 myqtysymen oınap, І oryn ıelendim. Ózimniń jetken jetistigime qýanyp turmyn», – dedi 15 jasar Tórehan Molbaı.
Sondaı-aq týrnırge qatysqan Aısha Tursynova «Qyzdar arasyndaǵy úzdik kórsetkish», Beksultan Ǵubashev «16 jasqa deıingi úzdik oıynshy» jáne Taıyr Jumabaev «50 jastan asqan ardager qatysýshy» atalymdary boıynsha marapattalyp, árqaısysyna 30 myń teńgeden aqshalaı syılyqtar tabys etildi.
Marapattaýdan keıin aldyn ala tirkelgen 10 áýesqoı oıynshy shahmat olımpıadalarynyń jeńimpazy, Qazaqstan chempıony Roman Kozlovpen bir mezettik oıyn seansyna qatysty.
Aıta keteıik, «Shahmat kerýeni» – Qazaqstan shahmat federatsııasynyń óńirlerdegi ıntellektýaldy sport túrin damytý úshin qolǵa alǵan jobasy.
Ulttyń zııatker urpaǵyn qalyptastyrýdy maqsat etken jobaǵa Freedom Broker kompanııasy bas demeýshilik jasap otyr. 10 qarashada ár oblystyń úzdik 60 oıynshysy qatysatyn grand-fınaldyń jeńimpazy 5 mln teńgeni óz qanjyǵasyna baılaıdy.
Al kerýenniń jalpy júlde qory – 16 mln teńge.