15 sheteldik bıyl Qazaqstanda arnaýly áleýmettik kómek alǵan

ASTANA. QazAqparat – Osy jyldyń 6 aıynda sheteldik 15 adam elimizde arnaýly áleýmettik kómek aldy. Bul týraly Eńbek jáne halyqty áleýmettik qorǵaý mınıstrliginiń Áleýmettik qyzmetter departamenti dırektorynyń orynbasary Gaýhar Qalmaqova aıtty, dep habarlaıdy QazAqparat tilshisi.

«Qazirgi tańda respýblıkamyz boıynsha 123 adamǵa qyzmet kórsetetin 14 daǵdarys ortalyǵy ashylyp, jumys istep tur. Eńbek jáne halyqty áleýmettik qorǵaý mıınstrligi tarapynan arnaýly áleýmettik qyzmetter 8 baǵytta kórsetiledi. Olar: áleýmettik-turmystyq, áleýmettik-medıtsınalyq, áleýmettik-pedagogıkalyq, áleýmettik-psıhologııalyq, áleýmettik-quqyqtyq, jumyspen qamtý máseleleri», - dedi ol Ortalyq kommýnıkatsııalar qyzmetinde ótken «Adam saýdasyna qarsy kúres: qurbandardyń quqyqtaryn qorǵaý» taqyrybyndaǵy dóńgelek ústel otyrysynda.

Onyń atap ótýinshe, 2023 jyldyń 1 shildesinen bastap kúshine engen Áleýmettik kodeks aıasynda jańa standarttar qabyldandy. Bul standarttar sapany, kólemdi jáne arnaýly áleýmettik qyzmetterdi kórsetý sharttaryn aıqyndaıdy. Munan bólek, jańa standarttar arnaýly áleýmettik qyzmetterdi kórsetetin barlyq memlekettik organnyń ózara is-qımylyn belgileıdi. Daǵdarys ortalyqtaryndaǵy qyzmet kórsetý merzimi 6 aıǵa deıingi ýaqytty qamtıdy. Qajet bolǵan jaǵdaıda ol uzartylýy da múmkin.

«Ótken jyldan bastap elimizde sheteldik azamattarǵa da arnaýly áleýmettik qyzmet kórsetile bastady. Máselen, osy jyldyń birinshi jartyjyldyǵynda sheteldik 15 adamǵa arnaýly áleýmettik qyzmet kórsettik», - dedi Gaýhar Qalmaqova.