15 mınýtta júregi tórt ret toqtap qaldy: Dárigerler naýqasty aman alyp qaldy

<p>ALMATY. KAZINFORM &ndash; Almatylyq dárigerler 15 mınýt ishinde júregi tórt ret toqtap qalǵan naýqasty aman alyp qaldy.</p>

Almaty densaýlyq saqtaý basqarmasynyń málimetinshe,42 jastaǵy er adam qalalyq kardıologııa ortalyǵyna jedel járdem brıgadasymen jedel mıokard ınfarktisimen jetkizildi.Qabyldaý kezinde naýqastyń júregi toqtap qalǵan.

Reanımatsııa jáne qarqyndy terapııa bólimshesiniń meńgerýshisi Ǵanı Býgıraevtyń aıtýynsha, naýqastyń júregi 15 mınýt ishinde ómirine qaýip tóndiretin arıtmııamen tórt ret toqtaǵan.

Aýyr jaǵdaıǵa qaramastan, reanımatologtar júrektiń jumysyn qalpyna keltire aldy.

Tamyrlardyń synı turǵydan zardap shekkenin bilgennen keıin dárigerler júrek bulshyqetindegi qan aınalymyn qalpyna keltirý úshin shuǵyl ota jasaý týraly sheshim qabyldady.

«Mundaı jaǵdaı tek kásibı daǵdyny ǵana emes, psıhologııalyq turaqtylyqty da qajet etedi. Sátti hırýrgııalyq aralasýdan keıin naýqastyń jaǵdaıy turaqtalyp, ol úıge shyǵaryldy»,- dedi dáriger.

Osyǵan deıin, Almaty oblysynyń dárigerleri tórt ret júregi toqtap qalǵan, jańa bosanǵan anany aman alyp qalǵan bolatyn.