15 qyrkúıekten bastap Atyraý avtobýstarynda jańa tarıf engiziledi

ATYRAÝ. QazAqparat – Atyraý avtobýstarynda saralanǵan tarıf 15 qyrkúıekten bastap engiziletin boldy, dep habarlaıdy QazAqparat.

Osy ýaqytqa deıin jańa tarıf 1 qyrkúıekte engiziledi dep josparlanyp kelgen bolatyn.

«Ýaqytty aýystyrý sebebimiz – halyq saralanǵan tarıf jóninde áli de kóp bile bermeıdi. Ásirese, jeńildigi bar jolaýshylar. Kópbalaly analar, zeınetkerler, oqýshylar men stýdentter jol kartasyn árqaısysy óz atyna rásimdep, 500 teńgeden satyp alýy tıis. Ony tek múgedekter ǵana satyp almaıdy. Kólik kartasyn ázirleý biraz ýaqytty alady. Sonymen qatar, sońǵy aptada halyq dúrligip, jol kartasyna qatysty qarbalas týyndady. Sóıtip bir aptada ǵana qala turǵyndary 27 myńnan astam kartany satyp alyp úlgerdi», - deıdi «Smart Atyraý» memlekettik kommýnaldyq mekemesiniń dırektory Ádilbek Tankıev.

Eske sala keteıik, saralanǵan tarıf engizilgen soń jolaqy qolma-qol tólegen jaǵdaıda – 150 teńge, kartamen tólese – 80 teńge bolady.