140 myń teńgeden bastalatyn bir jolǵy tólem týraly aqparat – feık

<p>ASTANA. KAZINFORM &ndash; Qazaqstanda barlyq azamattarǵa 140 myń teńgeden bastalatyn jańa arnaıy áleýmettik tólem paıda bolǵany týraly aqparat shyndyqqa janaspaıdy.</p>

QR Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, atalǵan aqparat áleýmettik jeliler men messendjerlerde taraǵan jáne onda tólemdi tekserý úshin siltemege ótý usynylady.

«Tólemniń mundaı túri joq ekenin habarlaımyz. Tıisinshe, habarlamada kórsetilgen silteme alaıaqtar úshin azamattardyń jeke derekterin alý tásili bolýy múmkin. Sol sebepti siltemege ótpegen jón. Memlekettik qoldaýdyń tıisti sharalary týraly resmı aqparat tek qana 1414 nómirinen SMS-habarlamalar arqyly taratylady. Azamattardan tek resmı kózderdegi aqparatty paıdalanýyn suraımyz. Jalǵan aqparat taratý zańmen jazalanatynyn esterińizge salamyz»,-delingen habarlamada.