14 jastaǵy qarı Túrkııada ótken halyqaralyq Quran saıysynan jeńispen oraldy

TARAZ. QazAqparat – Jambyldyq 14 jastaǵy qarı Dýlat Qalyǵulov Turkııa memleketinde ótken halyqaralyq Quran saıysynda dara shyǵyp, «Altyn belgi» atalatyn bas júldege ıe boldy, dep habarlaıdy QazAqparat.

11 jasynda Qurandy jattaǵan Dýlat qarı 14 jasynda elge tanylyp otyr.

Allanyń kálámi bolǵan Quran Kárimdi jattap shyǵý ekiniń birine buıyra bermeıdi. Mektepke barmastan, alty jasynda arabsha árip tanyǵan Dýlat, úıdegi bes balanyń ortanshysy. Ákesi, Dýlatty toǵyz jasynda Bangladesh memleketiniń astanasy Doha qalasyndaǵy qarılyq medresege bergen.

Quran oqý jarysynda Mysyr, Sırııa, Bahreın, Saýd Arabııasy, Iemen, Indonezııa, Malaızııa syndy alpaýyt memleketterden kelgen 600-den astam úmitker qatysqan. Áleýmettik deńgeıge ıe «altyn belgini» qanjyǵaǵa baılaýdyń sharttary da ońaı bolmaǵan. Al, Dýlattyń anasy Sáýle Shalbulova quran jattaǵandaǵy nıetimiz mundaı jarystarǵa qatysý úshin emes, bári de bir Allanyń razylyǵy úshin deıdi.Saıys sharty boıynsha qatysýshy mamandardyń aldynda 12 suraqqa jaýap berip, Allanyń Kálámin kez kelgen jerinen múdirmeı oqyp, aıattyń tarıhyna deıin bilý kerek-ti. Synnan súrinbeı ótip, naqty tolyq 100 upaıdy jınaǵan qatysýshylar ǵana osy ataqqa ilinbek. Mine, dál osy «altyn belgini» 630 qatysýshynyń arasynan 10 bala ıelense, sonyń biri - Dýlat.

Atalǵan qurmet gramotasyn Túrkııa eliniń mınıstri tabystap, jyly lebizin bildirdi. Sonymen qatar jeńimpazdardyń ishinen Dýlat Qalyǵulov Túrkııadaǵy «Hilaliye erkek Kur'an Kursu» ashylý saltanatyna arnaıy shaqyryldy.

Osy mártebesine oraı oblystyq «Hıbatýlla Tarazı» meshitinde jas qarıge arnaıy qurmet kórsetildi. Kópshilik jas qarıǵa shyn júrekten qurmetin jetkizip, elimizde bilimdi qarılardyń kóp bolýyn tilep, bata berdi.