14 ormanshynyń barlyǵy óli tabylǵany týraly aqparat jalǵan – Abaı oblysy ákimdigi

SEMEI. QazAqparat – Abaı oblysynyń ákimdigi Semeı ormanyndaǵy órtti sóndirý kezinde joǵalyp ketken 14 mamannyń barlyǵy qaza boldy degen aqparatty joqqa shyǵardy, dep habarlaıdy QazAqparat.

«Áleýmettik jeliler men messendjerlerde órt kezinde joǵalyp ketken ormanshylyqtyń barlyq 14 qyzmetkeri óli tabyldy degen aqparat tarala bastady. Bul aqparat shyndyqqa janaspaıdy. QR Tótenshe jaǵdaılar mınıstrligi rastaǵan resmı derekterge sáıkes, orman sharýashylyǵynda qaza tapqan úsh qyzmetker ǵana tabyldy. Tek resmı aqparat kózderine senýińizdi suraımyz», - delingen ákimdik málimetinde.

Eske salaıyq, búgin Semeı ormanyndaǵy órtti sóndirýge jumyldyrylǵan 14 mamanmen baılanys úzilgen bolatyn. Keıin 3 qyzmetkerdiń qaza tapqany anyqtaldy.

Memleket basshysy Qasym-Jomart Toqaev Tótenshe jaǵdaılar mınıstri ıÝrıı Ilınge oqıǵa ornyna jedel baryp, órt sóndirý jumystaryn basqarý mindetin júktep, kóz jumǵan orman sharýashylyǵy qyzmetkerleriniń otbasylaryna qajetti kómek kórsetýdi tapsyrdy.

«Semeı» ormany rezervatynda órt 8 maýsym kúni shyqqan bolatyn.

Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Osyǵan baılanysty búgin Semeı qalasynda jergilikti aýqymda tabıǵı sıpattaǵy tótenshe jaǵdaı rejımi jarııalandy.