14 kúnnen keıin Besqaraǵaı aýdanyndaǵy orman órti sóndirildi

SEMEI. QazAqparat – Abaı oblysynyń Besqaraǵaı aýdanynda 14 shilde kúni tutanǵan orman órti sóndirildi, dep habarlaıdy QazAqparat Tótenshe jaǵdaılar mınıstrligine silteme jasap.

««Semeı Ormany» memlekettik orman tabıǵı rezervaty ókilderiniń aqparaty boıynsha 26 shilde kúni saǵat 18:00-de Besqaraǵaı aýdanyndaǵy orman órti 385 gektar alqapta tolyǵymen sóndirildi», - delingen TJM málimetinde.

Jalynmen kúresti kún raıynyń qolaısyzdyǵy qıyndatqan: joǵary aýa temperatýrasy, ekpindi jel, sondaı-aq daqyldardyń tyǵyz ósýi, tuzdy jáne batpaqty jerler bolǵan.

Degenmen, ormanshylar men órt sóndirýshiler ystyq aýa raıyna qaramastan janqııarlyq erlikke baryp, úılesimdi shuǵyl áreket etti. Sonyń arqasynda tilsiz jaý tolyǵymen aýyzdyqtaldy.

Abaı oblysynyń qutqarýshylary azamattardy órt qaýipsizdigi qaǵıdalaryn saqtaýǵa shaqyrady.

Eske salaıyq, Begenev ormanshylyǵynda qurǵaq shóptiń órtenip jatqany jáne orman qoryna qaýip bar ekeni týraly habarlama 15 shildede túsken bolatyn. «Semeı Ormany» rezervatynyń jáne Abaı oblysy Tótenshe jaǵdaılar departamentiniń qyzmetkerleri oqıǵa ornyna dereý attanǵan.

14 shildede tutanǵan órtke qatysty Besqaraǵaı aýdanynda tótenshe jaǵdaı jarııalandy. Besqaraǵaı aýdanynyń ákimi Talǵat Muratovtyń sheshimi Ashyq NQA portalynda jarııalandy.