14 bala polıtsııaǵa bomba týraly ótirik habar bergen, kóbi Almatyda turady

<p>ІІM ekstremızmge qarsy is-qımyl departamenti asa mańyzdy ister jónindegi aǵa jedel ýákili Azamat Hasenov terrorızm aktisi týraly jalǵan habar bergenderge qandaı jaýapkershilik baryn túsindirdi, dep habarlaıdy <a href="https://polisia.kz/iim-terrorizm-aktisi-turaly-korineu-zhalghan-habar-bergeni-ushin-zhauapkershilik-baryn-eske-saldy/" target="_blank" rel="noopener">Polisia.kz</a>.&nbsp;</p>

— 2023 jyldyń basynan beri terrorızm aktisi týraly qansha jalǵan habarlama kelip tústi? 2022 jylmen salystyrǵanda aıyrmashylyq bar ma?

— Iá, 2022 jylmen salystyrǵanda bıyl mundaı qylmystardyń shamamen 12%-ǵa óskeni baıqalady. Máselen, eger ótken jyldyń 10 aıynyń qorytyndysy boıynsha 141 qylmystyq iske tergeý júrgizilse, bıyl 160 qylmystyq is tergelip jatyr.

— Terrorızm aktisi týraly kórineý jalǵan habar bergeni úshin bir jylda qansha adam qylmystyq jaýapkershilikke tartyldy?

— Jyl basynan beri terrorızm aktisi týraly kórineý jalǵan habar bergeni úshin 39 adam qylmystyq jaýapkershilikke tartyldy. Onyń ishinde túrli jaza taǵaıyndalyp, 12 adam sottaldy: bas bostandyǵynan aıyrý jazasyna — 3 adam, bas bostandyǵyn shekteý jazasyna 7 adam tartyldy, bir adamǵa aıyppul salynsa, bir adamǵa medıtsınalyq sıpattaǵy májbúrleý sharasy belgilendi.

— Mundaı habarlar qaı óńirlerde jıi jasalady?

— Mundaı habarlamalar Astana jáne Almaty sııaqty iri qalalarda jıi kelip túsedi. Sońǵy ýaqytta Qaraǵandy jáne Shyǵys Qazaqstan oblystarynda «elektrondy jalǵan terrorızm» jaǵdaılary kóbeıdi. Jarylǵysh zat qoıyldy degen habarlamalarda kóbinese kólik quraldary, bilim berý, densaýlyq saqtaý jáne sot mekemeleri kórsetiledi.

— «Jalǵan terrorıster» arasynda jasóspirimder men balalardyń úlesi qandaı? Olardyń ózderi nemese ata-analary jaýapqa tartyldy ma?

— Esterińizge sala keteıin, bul qylmys úshin qylmystyq jaýapkershilik 14 jastan bastalady. Terrorızm aktisi týraly kórineý jalǵan habar bergeni úshin polıtsııa bıyl kámeletke tolmaǵan 14 balany ustady. Almatyda — 6, Qaraǵandy oblysynda — 4, Astana, Jambyl, Mańǵystaý men Pavlodar oblystarynda bir adamnan. Sondaı-aq báriniń ata-anasy ákimshilik jaýapkershilikke tartyldy. Olarǵa úlken somada aıyppul salyndy.

— Terrorızm aktisi týraly kórineý jalǵan habarlama úshin qandaı jaýapkershilik kózdelgen?

— Qylmystyq kodekstiń 273-babynyń sanktsııasy 5000 AEK (bul 17 mln teńgeden astam) mólsherinde aıyppul salýdy nemese bes jylǵa deıin bas bostandyǵynan aıyrýdy ıa shekteýdi kózdeıdi. Sonymen qatar sot sheshimi boıynsha obektige kelgen zalaldy tóleýge týra keledi. Bul soma 200 myńnan 2 mln teńgege deıin jetedi.