14 adamdy órtten qutqarǵan aqmolalyq polıtseıler marapattaldy

KÓKShETAÝ. QazAqparat - Táýelsizdik merekesi qarsańynda Aqmola oblysynda bir top tártip saqshysy marapattaldy. Onyń ishinde Kókshetaýda órt kezinde 14 adamdy qutqarǵan eki aǵa leıtenantyna gramota tapsyryldy, dep habarlaıdy QazAqparat tilshisi oblystyq PD baspasóz qyzmetine silteme jasap.

Sharada qoǵamdyq tártip pen zańdylyqty saqtaýǵa zor úles qosqan polıtsııa qyzmetkerlerin quttyqtap, marapattaǵan vedomstvo basshysy QR Іshki ister mınıstriniń quttyqtaý jedel hatyn oqyp berdi.

«Saltanatty sharada ekstremaldy jaǵdaıda erlik pen biliktilik tanytqan tártip saqshylary departament basshysynyń gramotalarymen marapattaldy. Onyń ishinde Kókshetaýda órt kezinde 14 adamdy qutqarǵan polıtsııanyń aǵa leıtenantary Oljas Álpeıisov pen Ersaıyn Elýbaev bar. Sonymen birge, jas tártip saqshylary - Kókshetaý qalalyq polıtsııa basqarmasynyń tergeýshisi, polıtsııa leıtenanty Aıbek Rahımov pen PD Ákimshilik polıtsııa bóliminiń ınspektory, polıtsııa leıtenanty Tımýr Shaıhınovtyń ata-anasyna Alǵys hat joldandy» dedi vedomstvodan.

Budan bólek, 10 tártip saqshysyna «Quqyq tártibin qamtamasyz etýge qosqan úlesi úshin» medali men «Іshki ister organdarynyń úzdigi» tósbelgisi, QR ІІM Alǵys haty men gramotasy tapsyryldy.

Aıta keteıik, jeltoqsannyń 12-da Kókshetaý qalasynda órt bolyp, oqıǵa ornyna birinshi jetken tártip saqshylary Oljas Álpeıisov pen Ersaıyn Elýbaev 14 adamdy qutqardy, onyń tórteýi - bala.