13 jasar týys qaryndasyn zorlaǵan kúdiktiniń birine izdeý jarııalandy

<p>TARAZ. KAZINFORM &ndash; Jambyl oblysynda 6 jyl boıy týys eki aǵasynan zorlyq-zombylyq kórgen 13 jasar qyzdyń isine baılanysty polıtsııa qyzmetkerleri jedel-izdestirý is-sharalaryn júrgizdi. Nátıjesinde bir kúdikti izin sýytpaı ustalyp, qamaqqa alyndy. Ekinshi kúdiktige qatysty izdeý jarııalandy.&nbsp;</p>

Buǵan deıin qylmysty jasaǵan eki kúdikti anyqtalǵan edi. Jambyl oblysy PD kúdiktiniń birin ustaý boıynsha qajetti is-sharalar júrgizilip jatqanyn habarlady. 

Aıta keteıik, atalǵan derek boıynsha Qazaqstan Respýblıkasy Qylmystyq kodeksiniń 120-baby 4-bóligimen (jas balaǵa qatysty zorlaý áreketi – ómir boıyna bas bostandyǵynan aıyrýǵa jazalanady) qylmystyq is qozǵalǵan bolatyn. 

Sonymen qatar oqýshynyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaǵany úshin mektep qyzmetkerlerine qatysty QR QK 141-baby 1-bóligimen qylmystyq is qozǵaldy.

Qazirgi ýaqytta jedel-tergeý toby jumys isteýde.  Qylmystyq is Polıtsııa departamenti basshylyǵynyń baqylaýyna alyndy. 

Atalǵan oqıǵaǵa baılanysty Bala quqyqtary jónindegi ýákil Dınara Zákıeva Facebook-tegi paraqshasynda jazba jarııalady. 

– Óńirlik ýákilmen birge 6 jyl boıy týys eki aǵasynan zorlyq-zombylyq kórgen 13 jasar qyzdyń isimen jumys istep jatyrmyz. Qylmystyq is qozǵaldy, qyz anasymen birge qaýipsiz jerge kóshirildi, qajetti kómektiń bári kórsetilýde. Oblys ákiminiń orynbasarynyń tóraǵalyǵymen ótkizilgen kóshpeli komıssııa otyrysynyń nátıjesinde aýdan ákiminiń orynbasary men mektep dırektoryna qatysty sharalar qabyldandy. Qyz oqyǵan mektep – aýyldaǵy jalǵyz mektep. Bala psıholog jınaǵan saýalnamada sıgnal bergen, biraq onymen qajetti jumys júrgizilmedi. Laýazymdy tulǵalardyń nemquraılylyǵy úshin jaýapqa tartý maqsatynda prokýratýraǵa júgindim, - dep jazdy Dınara Zakıeva. 

Eske sala keteıik, buǵan deıin elimizde zorlyq-zombylyqtan zardap shekken balalarǵa kómek baǵdarlamasy engizilip jatqany týraly jazǵan edik.