13 jasar qyzdy ańdyǵan — Semeıde kúdikti er adam kómekke kelgen polıtseıge pyshaq saldy

<p>SEMEI. KAZINFORM - Semeı qalasynda 13 jasar qyzdyń sońyna túsken er adam kómekke kelgen polıtseıge pyshaq suqty.</p>

Polıtsııaǵa habarlasqan qyz ózin belgisiz adamnyń ańdyp júrgenin aıtqan. Jetkinshek dúkenge kirip ketkenin, syrtqa shyǵýǵa qorqyp turǵanyn jetkizdi.

Ýchaskelik polıtsııa ınspektorlary dereý sol jerge kelip jetti. Olar dúkenniń janynda turǵan kúdiktini baıqap, mán-jaıdy anyqtaýǵa tyrysty. Biraq jigit qolyna pyshaq alyp, tártip saqshylaryna júgire jóneldi.

- Polıtseıler er adamdy dúkennen alshaqtaý jerge alyp ketý kerektigin túsindi. Óıtkeni onda kóp adam júredi. Olar agressıvti er adamnyń nazaryn ózderine aýdara otyryp, ratsııamen qosymsha kómek shaqyrtty. Patrýldik polıtsııa ekıpajy shuǵyl oqıǵa ornyna keldi, - dep habarlady Abaı oblystyq Polıtsııa departamentinen.

Zańsyz áreketterdiń jolyn kesý úshin qyzmettik kólikten shyqqan patrýldik polıtseı Ashat Ahatovqa er adam atyla ketip, pyshaq suǵyp jiberdi. Osyǵan qaramastan, jaralanǵan qyzmetker áriptesterimen birge jekpe-jek ádisterin qoldanyp, ony qolǵa túsirdi.

- Basynan úsh ret jaraqat alǵan polıtsııa qyzmetkeri aýrýhanaǵa jetkizilip, oǵan medıtsınalyq kómek kórsetildi. Qazirgi ýaqytta kúdikti ýaqytsha ustaý ızolıatoryna qamaldy. Tergeý amaldary júrgizilýde, - delingen habarlamada.