13 aımaqta un qymbattady – mınıstrlik sebebin túsindirdi

<p>Qazir keıbir óńirlerde kásipkerler bıdaıdy qymbat baǵamen sata bastady. Bul týraly BAQ ókilderiniń qatysýymen ótken brıfıngide Saýda komıtetiniń tóraǵasy Aıdar Ábildabekov aıtty, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.&nbsp;</p>

«Qazir keıbir óńirlerde kásipkerler bıdaıdy qymbat sata bastady. Ózderińiz estigendeı, 2-3 ret jańbyr jaýyp, bıdaı keppeı jatyr. Tıisinshe bıdaı qaıta kóktep ketti. Ol endi azyq-túlik retinde paıdalanýǵa bolatyn surypqa jatpaıdy. Odan durys un shyqpaıdy. Onyń ústine qazir 13 aımaqta un baǵasy ósip jatyr. Buǵan ajıotajdyq suranys sebep, ıaǵnı «oıbaı bizde bıdaı jetpeı qalady» degen dúrbeleń. Aýyl sharýashylyǵy mınıstrligi bıdaı qory jetkilikti ekenin baıandaıdy. Degenmen keıbir aımaqtarda 50 paıyzǵa deıin un qymbattady. Ony biz kórip otyrymyz.», - dep toqtaldy Aıdar Ábildabekov.

Onyń aıtýynsha, azyq-túlik korporatsııalarynyń qoımasynda 95 myń tonna bıdaı saqtaýly tur.

«Jergilikti ýákiletti organdarǵa osy bıdaıdy dıirmenderge jetkizý boıynsha tapsyrma berildi. Ol úshin korporatsııa men dıirmen arasynda memorandým jasalýy tıis. Bir apta buryn berilgen tapsyrmaǵa saı, qazir bul baǵytta jumystar júrip jatyr. Endi operator (dıirmen - avtor túsindirmesi) aqshasyn tólegen soń, QTJ olarǵa bıdaıdy jetkizedi», - dedi Aıdar Ábildabekov BAQ ókilderiniń saýalyna jaýap bere otyryp.

Ol atap ótkendeı, qandaı da bir taýar tapshyǵy baıqalsa, kásipkerler birden baǵany kóterip jiberedi.

«Biz búgin tańerteń Básekelestikti qorǵaý jáne damytý agenttigine habarlasyp, usynys engizdik. Olar naryqtaǵy iri «oıynshylarǵa» suranys jiberip, tergeýdi bastaımyz dep josparlap otyr», - dep túıindedi Aıdar Ábildabekov.