13 adamnyń malyn urlap, 6,9 mln teńge shyǵynǵa batyrǵan atyraýlyq 7 jylǵa sottaldy

<p>ATYRAÝ. KAZINFORM — Atyraý oblysynda er adam 13 jábirlenýshiniń malyn urlap, 6,9 mln teńge shyǵyn keltirgen. Sot úkimimen aıyptalýshy 7 jylǵa sottaldy. Qyzylqoǵa aýdandyq sotynda bótenniń malyn jasyryn túrde birneshe ret jymqyrǵan Q.-ǵa qatysty qylmystyq is qaraldy. Kúdiktige QR Qylmystyq kodeksiniń 188-1-babynyń 3-bóliginiń 1) tarmaǵymen aıyp taǵylǵan.</p>

«Sottalýshy Q. óziniń sharýa qojalyǵynyń aýmaǵynda bótenniń birneshe sıyry jaıylyp júrgenin kórip, paıdakúnemdik nıetpen birneshe ret jasyryn jymqyrǵan. Urlaǵan maldy satyp, aqshasyn óz qalaýy boıynsha jumsaǵan. Onyń quqyqqa qarsy áreketinen 13 jábirlenýshige 6 mln 900 myń teńge materıaldyq shyǵyn keltirilgen. Onyń kinási óziniń jáne jábirlenýshilerdiń jaýaptarymen, qylmystyq is materıaldarymen dáleldendi», — dep habarlady aýdandyq sottan.

Bul iste nazar aýdaratyn bir jaıt bar. Bul — sottalýshynyń qylmys jasaǵan kezde burynǵy urlyǵy úshin probatsııalyq baqylaýda júrgeni.

Prokýror sottalýshyǵa jaza taǵaıyndaý kezinde eki bapty qoldanýdy usyndy. Birinshisi — aıyp taǵylǵan bappen múlkin tárkileýsiz, 6 jylǵa bas bostandyǵynan aıyrý. Al, ekinshisi — Qylmystyq kodekstiń 60-babynyń 1-bóligi negizinde burynǵy úkim boıynsha jazasynyń ótelmegen bóligin ishinara qosý arqyly túpkilikti 7 jyl merzimge bas bostandyǵynan aıyrý jazasyn taǵaıyndaý.

Jábirlenýshilerdiń birqatary qatań jaza taǵaıyndaýdy surady. Keıbiri jaza taǵaıyndaý máselesin sottyń quzyryna qaldyrdy. 

Sot jaza taǵaıyndaý kezinde mynadaı jaıttardy eskerdi. Birinshiden, sottalýshy kinásin moıyndap, ókinishin bildirgen. Ekinshiden, onyń jas balalary bar. Mine, osy jaıttar jazany jeńildetetin mán-jaılar retinde qaraldy. Alaıda, sottalýshy tótenshe jaǵdaı kezinde qylmystyq quqyq buzýshylyq jasaǵan. Bul — jazany aýyrlatatyn mán-jaı.

«Sot úkimimen Q. QR Qylmystyq kodeksiniń 188-1-babynyń 3-bóliginiń 1) tarmaǵymen kináli dep tanyldy. Oǵan 60-baptyń 1-bóligimen túpkilikti 7 jyl merzimge bas bostandyǵynan aıyrý jazasy taǵaıyndaldy», — dep málim etti aýdandyq sottan. 

Sot úkimi zańdy kúshine engen joq.

Eske sala ketelik, buǵan deıin buryn Atyraý munaı óńdeý zaýytynyń eks-dırektorynan 2 mlrd teńge zalal óndirilgenin habarlaǵan edik.