120 myńǵa jýyq adam «Birge - taza Qazaqstan» aktsııasyna atsalysty

NUR-SULTAN. QazAqparat - Búgin Qorshaǵan ortany qorǵaý kúni men Ekologtar kúni aıasynda respýblıka boıynsha «Birge - taza Qazaqstan» aktsııasy ótti, dep habarlaıdy QazAqparat Ekologııa, geologııa jáne tabıǵı resýrstar mınıstrliginiń baspasóz qyzmetine silteme jasap.

Oǵan 120 myńǵa jýyq erikti, ekologtar men túrli sala mamandary qatysty. Senbilikte QR Ekologı, geologııa jáne tabıǵı resýrstar mınıstri Maǵzum Myrzaǵalıev bul kúnniń mańyzdylyǵyna toqtalyp, sala mamandaryn, ekoeriktilerdi kásibı merekemen quttyqtady.

«Bul aktsııa memleket usynǵan aýqymdy bastamalardyń biri bolyp sanalady, óıtkeni ol tek memlekettik organ qyzmetshileri tarapynan ǵana emes, halyq tarapynan da qoldaý tapty. Senbilikke negizinen tazartýdy qajet etetin aýmaqtar tańdap alyndy. Qorshaǵan ortaǵa arnap jatqan qyzmetimizden keıin, aýmaq taza, uqypty bolady degen senimdemiz»,- dedi Maǵzum Myrzaǵalıev.

Ekologııa mınıstriniń orynbasary Ahmetjan Pirimqulov jyl saıyn senbilikke shyǵatyn halyqtyń sany artyp kele jatqanyn aıtty. Jastardyń da úlesi joǵary. Sondaı-aq ol ekologtardy merekemen quttyqtap, bul mamandyqtyń memleket úshin úlken mańyzǵa ıe ekendigin jetkizdi.

«Bul aktsııa halyqtyń osyndaı problemalarǵa kóńil aýdarýy úshin kerek dep sanaımyz. Aktsııa búkil respýblıka boıynsha ótip jatyr. Barsha qatysýshylarǵa alǵys bildiremin. Sondaı-aq búkil qazaqstandyqtardy, ekologtardy kásibı merekesimen quttyqtaımyn»,- dedi vıtse-mınıstr.

Búkilálemdik qorshaǵan ortany qorǵaý kúniniń bıylǵy taqyryby - «Qaıta oılaný. Qaıta qurý. Qalpyna keltirý». Osy kúni ekologııalyq problemalarǵa álem nazaryn aýdarý úshin túrli sharalar uıymdastyrylady. «Birge taza Qazaqstan» tazalyq aktsııasy Qazaqstanda halyqty aınalaǵa uqypty qaraýǵa shaqyratyn dástúrge aınalyp keledi.

Al 5 maýsym Qazaqstanda Ekologtar kúni bolyp 2011 jyly belgilendi.