120 qazaqstandyq sarbaz BUU medalimen marapattaldy
Baspasóz málimetterine qaraǵanda, nagradalardy tabystaý saltanatty rásimi Lıvandaǵy BUU-nyń beketinde ótti. Oǵan 600-den asa adam qatysty. Onyń ishinde, 30 eldiń elshisi men áskerı attashesi, «Shyǵys» sektory bólimsheleriniń komandırleri bar.
Rásim jalaýlardy shyǵarý jáne qatysýshy elderdiń memlekettik ánuranyn oryndaýdan bastaldy. Rásimniń barlyq qatysýshylary aldynda «Shyǵys» sektorynyń komandıri general-maıor Antonıo Romero sóz sóılep, bitimgershilik mıssııaǵa qosqan úlesteri men adal qyzmetteri úshin bitimgershilerge alǵysyn bildirdi. 120 qazaqstandyq áskerı qyzmetshini BUU-nyń «Beıbitshilik úshin qyzmet» medaldarymen marapattady.
«Bul men úshin jáne barsha jeke quram úshin zor qurmet. Biz jaı ǵana medaldar alǵan joqpyz. Biz úshin birinshi kezekte bul bitimgershilik qyzmetke qosqan úlesimiz úshin memleketimizge degen qurmet. Lıvandaǵy bitimgershilik mıssııa men úshin birinshi, onyń ústine, rota komandıri laýazymynda ótti. Bul bizge úlken jaýapkershilikti júkteıdi. Biraq, bizdiń aldymyzda bir ortaq maqsat tur - Táýelsiz Qazaqstannyń týy astynda adal qyzmet atqarý», - dedi maıor Aıan Nurqasov.
Saltanatty rásimnen keıin qazaqstandyq bitimgershilik rotanyń kórkemónerpazdar ujymy uıymdastyrǵan kontsert ótti.
Esterińizge sala ketsek, qazaqstandyq bitimgershilerdiń birinshi rotasy BUU bitimgershilik mıssııasynyń merzimi 2019 jylǵy sáýirdiń aıaǵynda aıaqtalady. Olardyń ornyna qazirgi kezde daıyndyqtan ótip jatqan ekinshi rota Lıvanǵa attanady.