12 jastan asqan balalardy vaktsınalaý: Qandaı suraqtar jıi qoıylady

NUR-SULTAN. QazAqparat – QR Densaýlyq saqtaý mınıstrligi Sanıtarlyq-epıdemıologııalyq baqylaý komıteti 12 jastan asqan balalarǵa koronavırýsqa qarsy vaktsına saldyrýǵa qatysty suraqtarǵa jaýap berdi, dep habarlaıdy QazAqparat tilshisi.

Balanyń ımmýnıteti jaqsy bolsa vaktsınatsııa kerek pe?

Vedomstvo málimetinshe, KVI-ge qarsy vaktsına egiletin adamǵa koronavırýs ınfektsııasynan qorǵaıtyn arnaıy ımmýnıtet beredi.

Ókinishke qaraı, tabıǵı arnaıy emes ımmýnıtet keıde ınfektsııalarǵa qarsy tura almaıdy, nátıjesinde egilmegen adamdarda aýrý juqtyrǵan kezde syrqattanýdyń jáne asqynýlardyń qaýpi joǵary bolady.

«Infektsııadan keıingi ári vaktsınatsııadan keıingi asqynýlardyń jıiligi salystyrýǵa kelmeıdi. Máselen, koronavırýs ınfektsııasymen aýyrǵan kezde, shamamen 15 paıyz jaǵdaıda aýrýǵa ottegi terapııasyn qoldaný qajet bolady, taǵy 5 paıyzynda patsıentterdiń jaǵdaıy kúrdeli bolady. Yqtımaldyǵy joǵary aýrýdyń aýyr túrleri egde jastaǵy adamdarda jáne demikpemen, dıabetpen ári júrek aýrýlaryna shaldyqqan adamdarda asqynýy múmkin», - dep atalyp ótken komıtet málimetinde.

Sonymen qatar, KVI-ge qarsy ımmýndaýdan keıin aýyr qolaısyz jaǵdaılardyń tirkelýi is júzinde nóldik deńgeıde ekeni aıtylǵan.

Vaktsınalar tabıǵı ımmýnıtetti tómendete me?

«Vaktsınalar tabıǵı ımmýnıtetti tómendetpeıdi. Vaktsınatsııanyń týa bitken ımmýnıtetke áserin dáleldeıtin birde-bir zertteý joq. Eger Comirnaty (Pfizer) vaktsınasymen egý týa bitken ımmýnıtetti álsiretetini týraly nıderlandtyq zertteýge qatysty aıtatyn bolsaq, onda bul shyndyqqa jatpaıdy. Bul zertteýdiń qorytyndysy durys túsindirilmegen. Zertteýdiń máni - ımmýndyq júıeniń molekýlalyq deńgeıde qanshalyqty jaqsy jumys isteıtinin jáne týa bitken ımmýnıtetti «jattyqtyrýǵa» bolatyndyǵyn kórsetý», - dep jazylǵan komıtet habarlamasynda.

Balalarǵa jasalǵan BTsJ vaktsınasy koronavırýstan qorǵaı ma? Múmkin Pfizer-di ektirýdiń qajeti joq shyǵar?

«BTsJ vaktsınasy týberkýlezdiń arnaıy profılaktıkasy úshin qoldanylady jáne bul vaktsına týberkýlezdiń aýyr túrlerinen (mılıarly dıssemınatsııalanǵan týberkýlez, týberkýlezdi menıngıt) qorǵaıdy. Álemdik praktıkada osy vaktsınatsııanyń KVI-den qorǵaýǵa áseriniń bolýy týraly ǵylymı negizdelgen dálel joq. Osyǵan baılanysty, týberkýlezge qarsy vaktsınatsııa koronavırýs ınfektsııasynan qorǵaı almaıdy. KVI-den qorǵaý maqsatynda osy ınfektsııaǵa qarsy vaktsınatsııa usynylady. Álemdik deńgeıde jasóspirimderge Comirnaty (kompanıı «Pfizer») vaktsınasy usynylady, sondyqtan jasóspirimderge bul vaktsına KVI-den spetsıfıkalyq qorǵaý úshin usynylady», - delingen taratylǵan aqparatta.

Vaktsına ımmýndyq júıeni aýyrlatpaı ma ?

Komıtet derekterine qaraǵanda, adamnyń ımmýndyq júıesi kún saıyn kóptegen antıgendermen kezdesedi jáne olarmen kúresedi ári qorǵaýdy qamtamasyz etedi. Vaktsına dozasyndaǵy antıgender organızmdi eshqandaı jolmen aýyrlata almaıdy jáne KVI-ge qarsy arnaıy ımmýndyq qorǵanyshty óndirýge baǵyttalǵan.

KVI-ge qarsy vaktsına qalaı egiledi ?

«Óndirýshiniń nusqaýlyǵyna sáıkes, Comirnaty (Pfizer) vaktsınasy bulshyqetke salynady», - dep naqtylady vedomstvo ókilderi.

Aıta keteıik, elimizge Pfizer vaktsınasynyń 379 myń dozasy jetkizildi.

«Mınıstrlik Pfizer kompanııasynyń Comirnaty (Pfizer) vaktsınasynyń 4 mln 230 myń dozasyn vaktsına satyp aldy. Bul 2 mln 115 myń adamdy qamtýǵa múmkindik beredi. Respýblıkaǵa 379 myń doza kóleminde birinshi partııasy jetkizildi. Ony Dúnıejúzilik densaýlyq saqtaý uıymy 12-den 18 jasqa deıingi balalar men jasóspirimderdi, júkti jáne bala emizetin analardy vaktsınatsııalaý úshin usynady», - dedi Densaýlyq saqtaý mınıstri Alekseı Tsoı.

Úkimet basshysynyń orynbasary Eraly Toǵjanov Qazaqstanǵa Pfizer vaktsınasynyń jetkizilýine baılanysty bekitilgen talaptardy qatań sataýdy tapsyrdy.

15 qarashadan bastap elordada Pfizer vaktsınasyn egý bastalady.