12 shildege aýa raıy boljamy

ASTANA. QazAqparat – 12 shilde kúni respýblıkanyń basym bóliginde antıtsıklon jotasyna baılanysty jaýyn-shashynsyz kún raıy saqtalady. Eldiń tek batysy men soltústik-batysynda atmosferalyq frontaldy bólimder ótkennen keıin naızaǵaı oınap, jańbyr jaýady, kúndiz burshaq, daýyl kútiledi. Respýblıka boıynsha – ekpindi jel, ońtústikte shańdy daýyl boljanady, dep habarlaıdy QazAqparat Qazgıdrometke silteme jasap.

Túrkistan, Almaty, Aqmola, Aqtóbe, Shyǵys Qazaqstan, Qostanaı, Soltústik Qazaqstan, Pavlodar, Qaraǵandy, Qyzylorda, Jambyl, Ulytaý, Abaı, Jetisý oblystarynyń basym bóliginde qatty ystyq saqtalady.

Soltústik-Qazaqstan oblysynyń soltústiginde, batysy men ońtústiginde, Túrkistan oblysynyń shóldi aýdandarynda, Pavlodar oblysynyń ońtústiginde, soltústigi men ortalyǵynda, Qaraǵandy, Qostanaı, Qyzylorda, Ulytaý oblystarynyń ońtústiginde, Aqmola oblysynyń soltústigi men batysynda óte qatty ystyq kútiledi.

Respýblıkanyń barlyq aımaǵynda órt tutanýdyń tótenshe qaýpi bolady.