12 óńirde tarıfter 9,66 mlrd teńgege tómendetildi

ASTANA. QazAqparat – Bıylǵy tamyz aıynda QR Ulttyq ekonomıka mınıstrligi Tabıǵı monopolııalardy retteý komıteti tabıǵı monopolııalar sýbektileriniń 2020-2021 jyldarǵa tarıftik smetasyn jáne ınvestıtsııalyq baǵdarlamany oryndaý týraly esepterin qaraý nátıjesi boıynsha elimizdiń birqatar óńirinde jalpy somasy 9,05 mlrd. teńgege kommýnaldyq qyzmetterge tarıfterdiń tómendegendin habarlady.

Búgingi kúni Tabıǵı monopolııalardy retteý komıtetiniń 2021 jylǵy esepterine taldaý júrgizý sheńberinde 12 óńirde, atap aıtqanda Almaty, Shymkent qalalarynda, Aqmola, Aqtóbe, Atyraý, Almaty, Qaraǵandy, Shyǵys Qazaqstan, Jambyl, Mańǵystaý, Pavlodar, Qyzylorda oblystary boıynsha mynadaı salalarda: sýmen jabdyqtaý – 162 mln. tg, jylýmen jabdyqtaý – 379 mln. tg, sý burý – 22 mln. tg, elektr energııasyn berý – 37 mln. tg, taýarlyq gazdy tasymaldaý – 9 mln. tg jalpy somasy 609 mln. teńgege tarıfter qosymsha tómendetildi.

Nátıjesinde, qazirgi ýaqytta bekitilgen ýaqytsha ótemdik tarıftiń jalpy somasy (buryn atalǵan somalardy eskere otyryp) 9,66 mlrd. teńgeni quraıdy.

«TMRK monopolıst - sýbektilerdiń esepterine taldaý jumystaryn jalǵastyrýda. Nátıjeleri qosymsha habarlanatyn bolady»,-delingen QR Ulttyq ekonomıka mınıstrligi taratqan aqparatta.