12 óńirde «Abaı mektepteri» ashyldy – mınıstr

ASTANA. QazAqparat – Elimizdiń 12 óńirinde «Abaı mektepteri» jelisi quryldy. Bul týraly Oqý-aǵartý mınıstri Ǵanı Beısembaev Facebook-paraqshasynda jazdy, dep habarlaıdy QazAqparat.

Abaı mektepterinde «Qazaq tili», «Qazaq ádebıeti» jáne «Abaıtaný» pánderi boıynsha tereńdetilgen oqý baǵdarlamasy bekitilgen.

Qazaqtyń bas aqyny, hákim Abaı Qunanbaıulynyń týǵan kúnine oraı post jazǵan mınıstr Abaı kúnine oraı elimizdiń ár túkpirinde oqýshylar men ustazdardyń qatysýymen túrli sharalar ótkizilip jatqanyn jáne «Abaı oqýlary» baıqaýy búgin óz máresine jetkenin aıtty.

«Uly oıshyldyń bizge qaldyrǵan asyl murasy otanshyl, adal, parasatty, bilimdi, bilikti urpaq tárbıeleýdiń negizi dep aıtsaq artyq emes. Memleket basshysy Qasym-Jomart Toqaevtyń gýmanıtarlyq baǵyttaǵy Abaı mektepterin ashý týraly tapsyrmasyna sáıkes elimizdiń 12 óńirinde «Abaı mektepteri» jelisi qurylǵan bolatyn», - dedi Ǵanı Beısembaev.

Oqý-aǵartý mınıstriniń aıtýynsha, atalǵan bilim oshaqtarynda qazaq tili men ádebıeti tereńdete oqytylyp, básekege qabiletti, eldiń damýyna úles qosatyn eljandy tulǵalar tárbıelenýde.

«Almatydaǵy Abaı atyndaǵy respýblıkalyq mamandandyrylǵan daryndy balalarǵa arnalǵan mektep-ınternaty osy mektepterdiń ortalyq bazasy bolyp belgilenip, oqý-ádistemelik keshen daıarlaý, tájirıbe taratý jumystary júzege asyrylýda», - dedi mınıstr.

Málim bolǵandaı, «Amanat» partııasynyń «Halyqpen birge!» saılaýaldy baǵdarlamasy sheńberinde 2027 jylǵa deıin barlyq óńirde «Abaı mektepteri» ashylmaq.