12 myńnan asa qostanaılyqtyń kólik salyǵy boıynsha 190 mln teńge bereshegi bar

QOSTANAI. QazAqparat – Qostanaı oblysynda 12 myńnan astam júrgizýshi jalpy somasy 190 mln teńge bolatyn kólik salyǵyn tólemegen. Bul týraly óńirlik Memlekettik kirister departamentiniń baspasóz qyzmetinen málim etti, dep habarlaıdy QazAqparat tilshisi.

«Qostanaı oblysynda 12 myńnan astam adamnyń kólik salyǵy boıynsha 190 mln bereshegi bar. 26 mamyrdan bastap tólenbegen qaryzdy májbúrlep óndirip alý úshin is jeke sot oryndaýshylaryna beriledi», - dep málim etti jergilikti quzyrly organnan.

Belgili bolǵandaı, qaýlylar sot oryndaýshylaryna ótken jaǵdaıda boryshkerdiń shet elge shyǵýyna tyıym salynady. Sonymen birge, azamatty qamaýǵa alý, kólik quralyn aıyppul turaǵyna ornalastyrý, júrgizýshi kýáliginiń qoldanylýyn toqtatý men bank shottaryn buǵattaý sharalary qoldanylady.

«Jyl basynan beri ótken jyldardyń bereshegin tólemegeni úshin Lısakov, Rýdnyı qalalarynyń, Sarykól, Fedorov jáne Jitiqara aýdandarynyń 5 turǵyny 1-3 táýlikke deıin bultartpaý sharasymen qamaýǵa alyndy. Rýdnyı qalasynyń boryshkerine júrgizýshi kýáliginiń qoldanylýyn toqtata turý sharasy qabyldandy», - delingen departamenttiń baspasóz qyzmeti taratqan habarlamada.