12 myń adam kásip bastaý úshin memlekettik grant aldy - Eńbek mınıstrligi

ASTANA. QazAqparat - Bıylǵy 1 qazandaǵy jaǵdaı boıynsha 2021 – 2025 jyldarǵa arnalǵan kásipkerlikti damytý jónindegi ulttyq jobaǵa 533,1 myń adam qatysty. 345,1 myń adam jumysqa ornalasty. Onyń 224,3 myńy turaqty jumysqa ornalasty.

Jumys berýshilerdiń ótinimderi boıynsha kásiptik oqytýǵa 12,5 myń adam jiberildi, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Baspasóz qyzmeti taratqan derekterge qaraǵanda, óz kásibin bastaý úshin 12 myń adam memlekettik grant aldy.

Sýbsıdııalanatyn jumys oryndaryna 152,6 myń adam ornalastyryldy. Onyń ishinde áleýmettik jumys oryndarymen 13,6 myń, jastar praktıkasymen 25,3 myń, qoǵamdyq jumystarmen 107,7 myń adam, «Alǵashqy jumys orny» jobasy aıasynda 3,4 myń, «Urpaqtar kelisimsharty» jobasy aıasynda 425 adam, «Kúmis jas» jobasy aıasynda 2,2 myń adam jumyspen qamtyldy.

Sondaı-aq qyzmet salasyn tańdaý maqsatynda 105,6 myń adam áleýmettik kásiptik baǵdarlaýdan ótti.

Eske salaıyq, buǵan deıin halyqty jumyspen qamtýǵa arnalǵan sharalar Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda júzege asyryldy. 2021 jyly baǵdarlamaǵa 651,8 myń adam qatysty.

Memlekettik baǵdarlamaǵa qatysýshylar turaqty jáne sýbsıdııalanatyn jumys oryndarymen qamtyldy. Sondaı-aq olarǵa kásipkerlikti damytý úshin mıkronesıe men qaıtarymsyz memlekettik grant berilip, qoldaý kórsetildi. Qysqa merzimdi kýrstarda jáne kásiptik-tehnıkalyq bilim berý uıymdarynda oqytyldy.

Budan bólek, «Eńbek» baǵdarlamasyndaǵy baǵyttardyń biri aıasynda jumys kúshi kóp aımaqtardan jumys kúshi tapshy aımaqtarǵa kóshirildi.