12 mamyr kúni úsh oblysta úsik júredi - Qazgıdromet

<p>ASTANA. KAZINFORM &ndash; &laquo;Qazgıdromet&raquo; RMK el aýmaǵynda 12 mamyrda bolatyn qaýipti meteorologııalyq qubylystarǵa boljam jasady.</p>

Atmosferalyq frontaldy bólikter QR basym bóliginde turaqsyz aýa raıyn saqtaıtyn bolady: naızaǵaı oınap, jańbyr jaýady, batysta, ońtústik-shyǵysta qatty jańbyr, Almaty oblysynyń taýly jerinde jaýyn-shashyn (jańbyr, jylbysqy qar) jaýady.

«Respýblıkamyzdyń soltústiginde, ortalyǵynda antıtsıklon jotasynyń áserinen jaýyn-shashynsyz aýa raıy kútiledi. Respýblıka boıynsha jeldiń kúsheıýi, batysynda, ońtústik-shyǵysynda daýyl, burshaq, batysynda, ońtústik-batysynda shańdy daýyl, shyǵysynda, ortalyǵynda túngi jáne tańerteńgi saǵattarda tuman túsedi», dep jazdy sınoptıkter.

Derekke qaraǵanda, túnde Qaraǵandy oblysynyń soltústiginde, shyǵysynda, Aqmola oblysynyń shyǵysynda, Pavlodar oblysynyń batysynda, soltústiginde 1-3 gradýs úsik kútiledi.

Qaraǵandy oblysynyń batysynda, ońtústiginde, Ulytaý oblysynyń ortalyǵynda, Abaı, Aqtóbe oblystarynyń ońtústiginde, Batys Qazaqstan oblysynyń ońtústiginde, ortalyǵynda, Atyraý oblysynyń batysynda Qostanaı oblysynyń ońtústiginde, Qyzylorda oblysynyń batysynda, ortalyǵynda joǵary órt qaýipi saqtalady, joǵary órt qaýipi kútiledi, Túrkistan oblysynyń shóldi aýdandarynda tótenshe órt qaýipi saqtalady.