12 kúnde túsirilgen: «Tul» fılmi «Eýrazııa» kınofestıvalinde sensatsııa jasady

<p>ALMATY. KAZINFORM &ndash; XVII halyqaralyq &laquo;Eýrazııa&raquo; kınofestıvalinde qazaqstandyq &laquo;Tul&raquo; fılmniń tusaýy kesildi.</p>

Kınogerlerdiń sózinshe, naǵyz kınematografııalyq shedevr kópti qajet etpeıdi. Oǵan dálel 12 kúnde, shaǵyn ǵana qarjyǵa túsirilgen Shárıpa Orazbaevanyń «Tul» fılmi. Internatta ósken qyzdyń ómiri baıandalatyn kartına «Eýrazııa» halyqaralyq kınofestıvaliniń sensatsııasyna aınaldy.

«Fılmniń bıýdjeti shaǵyn ǵana boldy. Akterler kınoǵa tegin túsýge kelisti desek te bolady. Olardyń avtorlyq kınoǵa qoldaý kórsetkeni mańyzdy. Óz alǵysymdy bildiremin», – dedi fılmniń rejısseri Shárıpa Orazbaeva.

Fılmde baıandalǵan oqıǵa Shárıpanyń jaqyn qurbysynyń ómirine negizdelgen. Bul tek kıno ǵana emes, rýhtyń shynaıy dramasy. Kartınada jalǵyz qalyp, ınternatta ósken qyzdyń qıyndyqqa toly ómiri kórsetiledi.

«Qurbym taǵdyrdyń túrli synaqtaryn bastan keshken. Osydan soń ol kúrdeli psıhologııalyq qıyndyqtarǵa tap boldy. Qazir ol únemi ózin qubyjyq retinde elestetedi. Fılmniń sońynda dál osy sátti kórsetýge tyrystym. Sebebi biz ózimizdi qubyjyqqa aınaldyramyz»,– deıdi Orazbaeva.

Fılmde qańtar oqıǵasynyń kadrlary da kórsetildi.

«Qańtar oqıǵasy barlyǵymyz úshin aýyr jáne qaıǵyly taqyryp. Fılmde ony kórsetý arqyly bizge neniń mańyzdy ekenin aıtqym keldi», – deıdi qazaqstandyq rejısser.

Shárıpa Orazbaevanyń aıtýynsha, qazaq tilinde bul sóz tek jetim degendi ǵana bildirmeıdi. 

«Tul» fılmi tek jetim qyz týraly emes. Bul adamnyń ishki jan dúnıesindegi arpalys. Men osy sezimdi berýge tyrystym», – deıdi rejısser.

Kórermender kórsetilimnen keıin rejısser men akterlerden ózderin mazalaǵan suraqtardyń jaýabyn aldy.

Eske salaıyq, Almatyda halyqaralyq «Eýrazııa» kınofestıvali ótip jatyr.