12 qazan kúni Reseıdiń Qazaqstandaǵy Mádenıet kúnderi bastalady
Atap aıtqanda, 12 qazan kúni saǵat 19:00-de «Qazaqstan» Ortalyq kontsert zalynyń sahnasynda jetekshi reseılik oryndaýshylar men Qazaq memlekettik sımfonııalyq orkestriniń qatysýymen gala-kontsert ótedi. Kontsertke halyqaralyq baıqaýlardyń laýreattary Anna Aglatova (soprano), Vladıslav Kýprııanov (barıton), Vladımır Magomadov (kontratenor), Konstantın Emelıanov (fortepıano), Aleksandr Ramm (vıolonchel), Gaık Kazazıan (skrıpka) Anastasııa Tıýrına (balalaıka) qatysady. Sonymen qatar qazaq ánshileri óner kórsetedi. Dırıjer pýltinde – Osetııa Respýblıkasy – Alanııanyń eńbek sińirgen ártisi Zaýrbek Gýgkaev.
12-19 qazan aralyǵynda Qazaqstan Respýblıkasynyń Ulttyq murajaıynda Vologda memlekettik tarıhı-sáýlet jáne óner murajaı-qoryǵynyń jınaqtary usynylatyn «Vologda shilteri» jyljymaly kórmesi ótpek. Kórmeniń resmı ashylýy – 12 qazan, saǵat 16:00-de (QR Ulttyq murajaıy).
Reseıdiń Qazaqstandaǵy Mádenıet kúnderi Reseı Federatsııasynyń Mádenıet mınıstrligi jáne Qazaqstan Respýblıkasynyń Mádenıet jáne sport mınıstrliginiń qoldaýymen ótedi. Sharany uıymdastyrýshy – «Roskontsert» Federaldy mádenıet mekemesi.
Mádenıet kúnderi Reseı men Qazaqstannyń mádenıet salasyndaǵy dástúrli dostyq yntymaqtastyǵyn nyǵaıtý men damytýǵa baǵyttalǵan, sonymen qatar shynaıy qundylyqtar men mádenı muralardy odan ári saqtaýǵa yqpaldasýǵa shaqyrady.