12 qazaqstandyq qaryzynyń kóptiginen sýıtsıd jasaǵan

<p>Nesıesin tóleı almaǵan qazaqstandyqtar óz-ózine qol salyp, túrli qylmystar jasaýǵa májbúr bolýda. Bul týraly Іshki ister mınıstriniń orynbasary Igor Lepeha Parlamentte aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Aıtýynsha, tym kóp nesıe alý jáne ony tóleı almaýdyń kesirinen qaryz alýshylardyń ózin-ózi óltirýi ǵana emes, qylmysqa barý faktileri de oryn alýda.

«Bıyl nesıe alǵan 12 azamat óz-ózine qol saldy. Nesıe óteý úshin qajetti aqshany «tabý» maqsatynda tym kóp nesıe alǵan basqa 40 azamat tonaý, qaraqshylyq jáne urlyq sekildi túrli qylmystar jasaǵan», - dedi Igor Lepeha búgingi parlamenttik tyńdaýda.

Aıta keteıik, búgin Májiliste «Halyqtyń shamadan tys kredıt alýyn azaıtý jáne qarjy saýattylyǵyn arttyrý» taqyrybynda Parlament tyńdaýy ótti.

Buǵan deıin Igor Lepeha kıberqylmysqa qarsy turý úshin barlyq óńirlerde «CyberPol» mamandandyrylǵan jedel tergeý toptary qurylǵanyn, jábirlenýshilerge «bir tereze» qaǵıdatymen qyzmet kórsetiletinin aıtqan edi.

Sondaı-aq mınıstr orynbasary sheteldik alaıaqtardyń qońyraýlary buǵattalǵanyn, alaıda qazaqstandyqtardyń ózderi azdaǵan syıaqy úshin olarǵa járdem berip otyrǵanyn aıtty. 

Aldaǵy ýaqytta qazaqstandyqtar SIM-kartany tirkeýde bıometrııadan ótýge mindetteletini de belgili boldy.