Elimizde 111 myń otbasy ataýly áleýmettik kómek alyp otyr

<p>1 qarashadaǵy jaǵdaı boıynsha 111,2 myń otbasyndaǵy 583,3 myń adamǵa ataýly áleýmettik kómek taǵaıyndaldy. Bıyl osy maqsatqa bıýdjetten 64,7 mlrd teńge bólindi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

AÁK negizgi maqsaty — aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.

AÁK mynany kózdeıdi:

— tabysy óńirlik eń tómengi kúnkóris deńgeıiniń 70% aspaıtyn azamattarǵa toqsan saıyn áleýmettik kómek taǵaıyndaý;

— tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK (5 175 teńge) mólsherinde aı saıyn qosymsha tólem berý. 1 qarashadaǵy jaǵdaı boıynsha AÁK alýshylar qatarynan mektep jasyna deıingi 182 myń balaǵa qosymsha tólem taǵaıyndaldy;

— jumysqa ornalastyrý, óz isin ashýǵa nıetti otbasylarǵa grant berý, biliktilikti arttyrý kýrsyna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.

Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine sondaı-aq egov.kz elektrondyq úkimet portaly arqyly bere alady.